Altyn ordada damyǵan memlekettik apparat jumys istep turdy. Túrki akademiiasynyń sarapshysy, filologiia ǵylymdarynyń kandidaty Timýr Kozyrev elordada Álemdik ekonomika jáne saiasat institýty ujymynyń uiymdastyrýymen ótip jatqan «Altyn orda. Tarih pen taǵylym» atty dóńgelek ústelde osylai dedi, dep habarlaidy QazAqparat.
«Altyn orda – zańnama, kommýnikatsiia men logistikasy jolǵa qoiylǵan biregei memleket edi. Iaǵni, sol tustaǵy myqty memlekettiliktiń tolyqqandy atribýttary boldy! Altyn orda – imperiialyq memleket edi. Onyń qurylym úlgisinen Resei de kóp úlgi aldy», - dedi Túrki akademiiasynyń sarapshysy.
Timýr Kozyrevtyń aitýynsha, Altyn ordada qalanyń damyǵan órkenietti úlgisi bolǵan. Alyp memlekettiń qalalaryn Altyn ordanyń óz handary salǵyzǵan.
«Astana salynǵanda da alyp shahar ien dalada boi kótere salǵan joq. Elorda boi kótere bastaǵanda bilikti tarihshylar Uly daladaǵy qala qurylysynyń uly balamasyn kóre bildi. Bul – bizdiń qalalyq órkeniet. Uly dalada qalalyq órkeniet boldy – bola bermek. Osymen-aq bul áńgimege núkte qoiýǵa bolady. Sonymen birge, Altyn orda tusynda jazba ádebiet te bar edi. Damyǵan memlekettik apparat ta jumys istep turdy. Keiingi kezde Qazaqstan tarihqa kóbirek bet buryp ketken joq pa degen pikirler de aitylyp jatyr eken. Alaida ainalyp kelgende ótkensiz bolashaqtyń bolmaitynyn da eskerý kerek. HH ǵasyrdyń ózinde álem elderiniń ekonomikalyq órleýiniń ózi de qýatty simvolikalyq kapitaldyń arqasynda paida bolǵanyn eskergen abzal. Japoniiadan bastap birqatar eldiń tarihyn kóz júgirtseńiz boldy. Tipti álem eldirindegi milliarderlerdiń 90 paiyzy – dinastiianyń muragerleri. Muragerler ata-babasynyń da myqty bolǵanyn biledi», - dedi ol.
Timýr Kozyrevtyń aitýynsha, Qazaqstan shynynda da - Altyn ordanyń zańdy da tikelei murageri.
«Georafiiany, etnografiiany, memleketterdiń tarihyn bárin qarasańyz, osyǵan kózińiz jetedi. Bul jerde tarihi shyndyqty qaitarý kerek. Eshteńeni sozbalaýdyń da, konstrýktsiialaýdyń da qajeti joq», - dedi ol.
Eske sala ketsek, 2019 jyldyń 24 tamyzynda ótken «Ulytaý – 2019» halyqaralyq týristik forýmyna qatysqan Memleket basshysy Qasym-Jomart Toqaev Altyn ordanyń 750 jyldyǵyn merekeleý aiasynda birqatar jumys jasalý kerektigin atap ótken edi. Prezident Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýdy usyndy. Onyń aitýynsha, Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeidi.
