Premer-ministrdiń orynbasary - syrtqy ister ministri Muhtar Tileýberdi Qaraqalpaqstannyń belsendilerine ýaqytsha turýǵa ruqsat berý tártibin túsindirdi , dep habarlaidy Sputnik Qazaqstan.
Búgin Cenat otyrysynan keiingi brifingte jýrnalister Qaraqalpaqstannyń belsendilerine ýaqytsha turýǵa ruqsat berý týraly surady. Ministrdiń aitýynsha, barlyǵy zańǵa sáikes jasalady.
"Birinshiden, biz olardy Ózbekstan azamattary retinde qarastyramyz. Shekarany ótkende nemese kelgennen keiin quqyq buzýshylyq jasap jatsa, zań boiynsha jazalanady. Al qaitarý jaǵy eki eldiń arasynda, atap aitqanda, ishki ister ministrligi nemese shekara qyzmeti arasynda talqylanady", - dedi Tileýberdi.
Aita keteri, biyl 1 shildede Núkis qalasynda Ózbekstan konstitýtsiiasyna túzetýler engizýge qarsy jappai sherýler ótti. Halyq Qaraqalpaqstandy táýelsizdik alý múmkindiginen aiyratyn ózgeristi qalamaitynyn jetkizdi.
Onyń sońy tártipsizdikke ulasty, politsiia jáne qaýipsizdik kúshterimen qaqtyǵys bolyp, qarý qoldanylǵan. Tártipsizdikter kezinde 18 adam qaza tapty, júzdegen adam zardap shekti. Eki kúnde 516 adam ustalǵan.
Ózbekstan Prezidenti Shavkat Mirzieev 3 shildeden 2 tamyzǵa deiin Qaraqalpaqstanda tótenshe jaǵdai jariialap, komendanttyq saǵat engizdi. Biraq 21 shilde kúni tótenshe jaǵdaidy merziminen buryn toqtatty.
