Qazaqstanda internet pen áleýmettik jelilerdegi zańsyz kontentke qarsy kúres jalǵasýda. IIM málimetinshe, tikelei efir kezinde zań buzǵan 20-dan astam tresh-strimer ákimshilik jaýapkershilikke tartylǵan, dep habarlaidy ult.kz.
Vedomstvonyń aitýynsha, qaralym men donat qýǵan strimerler balaǵat sózder aityp, ádepsiz áreketke barǵan, qaýipti prankter uiymdastyryp, ózge adamdardyń ar-namysyna tigen. Mundai kontenttiń kámeletke tolmaǵandarǵa da qoljetimdi bolýy erekshe alańdaýshylyq týǵyzady.
Máselen, Shymkentte TikTok efirinde bylapyt sóz aitqan er adam 10 táýlikke qamalsa, Pavlodarda kólik júrgizip otyryp efirge shyqqan strimer 20 táýlikke qamaýǵa alyndy. Taldyqorǵan men Túrkistanda taǵy eki strimerge ákimshilik aiyppul salyndy.
IIM áleýmettik jelidegi jasyryn akkaýnttar jaýapkershilikten bosatpaitynyn eskertip, mundai quqyqbuzýshylyqtardyń aldyn alý jumystary jalǵasatynyn málimdedi.
