TikTok áleýmettik jelisi Astana men Almatyda keńselerin ashady. Bul týraly Shyǵys Eýropadaǵy TikTok Global Business Solutions direktory jáne TikTok Kazakhstan kompaniiasynyń bolashaq basshysy Anastasiia Panina aitty, dep habarlaidy QazAqparat.
«Qazaqstandaǵy aýditoriia shyǵarmashylyqqa beiim jáne adamdar óz úndeýlerin jetkizý úshin osy platformany paidalanady. Munda jańa kontent jasaityn kóptegen mýzykanttardy, muǵalimderdi, jas analardy kórip otyrmyz. Biz platforma retinde qaýymdastyqqa jaqyn bolǵymyz keledi, sondyqtan osy kúzde Qazaqstanda ókildik ashamyz. Biz bilim berý uiymdarymen, memleketpen kóbirek jobalar shyǵarǵymyz keledi, platformanyń kontentin barynsha qyzyqty ári paidaly etemiz», - dedi Anastasiia Panina Astana Media Week mediaforýmynda tilshilerge bergen suhbatynda.
Sonymen birge Panina qosymshanyń qazaq tiline aýdarylatynyn rastady jáne TikTok-ty bilim berý maqsatynda kreativti paidalaný mysaldaryn keltirdi.
«Bizde kreatorlardy damytý baǵdarlamasy bar, onda biz qandai avtorlardyń aýditoriiany qyzyqtyratynyn qarastyramyz jáne olarǵa platformanyń barlyq quraldarymen tanysýǵa múmkindik beremiz. Biz bilim berý baǵdarlamalaryn jańa deńgeige kóterýge kómektesemiz. Mysaly, himiia pániniń muǵalimi Ulan Úsenov himiia týraly áńgimeleitin beinerolikter jasaidy, eksperimentter júrgizedi, mýzyka qoiady. Bul kóptegen muǵalimder úshin shynymen shabyttandyrarlyq. TikTok Qazaqstanda óte tanymal, óitkeni aýditoriiasy óte kreativti», - dedi Anastasiia Panina.
Aita keteiik, Astana Media Week 26-28 qazan kúnderi ótedi. Onda 150 otandyq jáne halyqaralyq spikerlerdiń qatysýymen 30-dan astam is-shara bolady.
