Astana turǵyny TikTok áleýmettik jelisi arqyly Ulybritaniiaǵa jumysqa ornalastyrýǵa kómektesetinin aityp, azamattardy aldap kelgeni úshin sottaldy, dep habarlaidy ult.kz.
Tergeý málimetinshe, er adam áleýmettik jelide Angliiada jumysqa ornalastyrý týraly jarnamalar jariialap, qyzyǵýshylyq tanytqan azamattarǵa keńes berip, saýalnama toltyrǵan. Keiin qujattardy rásimdeý syltaýymen olardan aqsha aýdarýdy talap etken.
Alaida qarajatty alǵannan keiin ýáde etilgen qyzmetterdi kórsetpei, jábirlenýshilermen bailanysyn úzgen.
Onyń áreketinen 10 adam zardap shegip, keltirilgen jalpy materialdyq shyǵyn 1 million teńgeden asqan.
Sot er adamdy alaiaqtyq jasaǵany úshin kináli dep tanyp, 3 jyl 6 ai merzimge probatsiialyq baqylaýmen bas bostandyǵyn shekteý jazasyn taǵaiyndady.
Sondai-aq sot úkimine sáikes, oǵan probatsiia qyzmetiniń kelisiminsiz turǵylyqty jeri men jumys ornyn aýystyrýǵa, oiyn-saýyq oryndaryna barýǵa tyiym salyndy. Eger sottalǵan azamat jumyssyz bolsa, jyl saiyn 100 saǵat májbúrli eńbekke tartylatyn bolady.
Eske salaiyq, buǵan deiin Astanada internet arqyly «jeńil tabys» izdep, óz atyna ashylǵan bank shotynyń derekterin bógde adamdarǵa bergen turǵynǵa 216 myń teńge aiyppul salynǵan bolatyn. Tergeý málimetinshe, onyń banktik shoty kriptovaliýta operatsiialaryn júrgizý úshin paidalanylǵan.
