Belarýs oppozitsiiasynyń jetekshisi Svetlana Tihanovskaia Aleksandr Lýkashenkony bilikten ketirýge baǵyttalǵan jalpyulttyq ereýil “endi ǵana bastaldy jáne barǵan saiyn aýqymy keńeie beredi” dep málimdedi. 26 qazanda elde myńdaǵan jumysshy, stýdent, zeinetker oppozitsiia sherýin qoldap, kóshege shyqqan.
“Búgin batyldyq tanytyp, ereýilge shyqqan árbir belorýspen maqtanamyn” dedi Tihanovskaia. Ol eldegi barlyq adam kóshedegi narazylyqqa qosylýy tiis dedi.
“Jalpyulttyq ereýilge qosyl. Bul rejimdi qulatýdyń jalǵyz joly jáne belorýs halqy, bárimiz, birigip, jańa ári erkin, qaýipsiz memleket quramyz” dedi kórshi Litvadan Belarýstegi jaqtastaryna Zoom arqyly shyqqan oppozitsiia jetekshisi. Ol 9 tamyzda ótken prezident sailaýynan keiin bilik qysymymen kórshi memleketke ketýge májbúr bolǵan.
Ol "ereýil sátsiz bastaldy" degen rejim jaqtastarynyń sózin elemei, belorýs halqyn quqyqtaryn talap etýge shaqyrdy.
Osyǵan deiin Tihanovskaia Aleksandr Lýkashenkoǵa ýltimatým qoiyp, 26 qazanǵa deiin bilikten bas tartyp, sasiai tutqyndardy bosatýdy talap etken. Bilik talaptardy oryndamasa, elde jalpyulttyq ereýil bastalyp, joldar jabylady, memlekettik kásiporyn ónimderine boikot jariialanatyny aitylǵan edi.
25 qazan jarym túnge deiin bilikten ketýi tiis degen oppozitsiia talabyn qabyldaýdyń ornyna Lýkashenko 26 qazanda narazylardy baqylaityn arnaiy jasaq sanyn kóbeitti. "Vesna" quqyq qorǵaý tobynyń málimetinshe, dúisenbi kúni Minsk, Grodno, Brest, Lida jáne ózge qalalarda 300-den astam adam ustalǵan.
