Japoniiada ótip jatqan V Aziia Para oiyndarynda Qazaqstan ulttyq quramasy tarihi nátijege qol jetkizdi, dep habarlaidy ult.kz.
Otandyq para sportshylar jarystyń alǵashqy úsh kúninde 10 altyn medal jeńip alyp, Aziia Para oiyndaryndaǵy burynǵy úzdik kórsetkishin jańartty. Qazirgi ýaqytta ulttyq quramanyń qorjynynda 32 medal bar. Onyń 10-y altyn, 10-y kúmis jáne 12-si qola.
El qorjynyna altyn júldelerdi para nysana kózdeýden Erkin Ǵabbasov, para paýerliftingten David Degtiarev, para dziýdodan Ibragim Nurmahanuly, Beksultan Qulmyrza, Aqtolqyn Seiilbekova, Zarina Raifova, Shýkýrbekov Jýrqamyrza, para júzýden Dias Kenjebek, para velosporttan Nail Ermuhanbet pen Anastasiia Kalaýs saldy.
Buǵan deiin Qazaqstan quramasynyń eń joǵary nátijesi 2023 jyly Qytaidyń Hanchjoý qalasynda ótken IV Aziia Para oiyndarynda tirkelgen edi. Ol kezde otandyq sportshylar 8 altyn, 12 kúmis jáne 21 qola medal ielenip, jalpy sany 41 júldege qol jetkizgen. Osylaisha, biyl ulttyq qurama altyn medal sany boiynsha burynǵy rekordty jańartyp, el sportynyń tarihynda jańa beleske kóterildi.
Búgingi jarys kúni áli aiaqtalmaǵanyn jáne alda birneshe jarys kúni bar ekenin eskersek, sportshylardyń júlde qorjynyn odan ári tolyqtyrýǵa múmkindigi mol.
Bul jetistik elimizde para sporttyń qarqyndy damyp kele jatqanyn jáne sportshylarymyzdyń halyqaralyq arenadaǵy básekege qabilettiliginiń artqanyn kórsetedi.
Tarihi nátije sportshylar men jattyqtyrýshylardyń qajyrly eńbeginiń, sondai-aq para sportty damytýǵa baǵyttalǵan júieli memlekettik qoldaýdyń jemisi.
Aita keteiik, biylǵy Aziia Para oiyndarynda Qazaqstan namysyn 150 sportshy qorǵap jatyr. Jarys 24 qazanǵa deiin jalǵasady.
