Belarýs oppozitsiiasynyń jetekshisi Svetlana Tihanovskaia óz elindegi daǵdarystan shyǵý úshin joǵary deńgeidegi halyqaralyq konferentsiia ótkizý jóninde usynys tastady.
Twitter-de jazǵan málimdemesinde ol Belarýs «demokratiialyq kúshteriniń, sondai-aq Eýropa odaǵynyń, Reseidiń, Ulybritaniia men AQSh-tyń úkimetteri, parlamentteri jáne azamattyq qoǵam toptarynyń» jáne Aleksandr Lýkashenko rejimi ókilderiniń qatysýymen mundai konferentsiia ótkizý «óte mańyzdy» ekenin aitty.
6 mamyrdaǵy jazbasynda Tihanovskaia Eýropa odaǵyn Belarýstiń azamattyq qoǵamy men ekonomikasyna kómek kórsetýdiń keshendi josparyn jariialaýǵa shaqyrdy. Ol 4 mamyrda mundai ótinishti Eýroodaq memleketteri syrtqy ister ministrlerine jáne halyqaralyq qatynas komitetterine joldaǵanyn habarlady.
Budan buryn da Tihanovskaia AQSh kongresi komissiiasynyń aldynda onlain sóz sóilep, joǵary deńgeidegi konferentsiia uiymdastyrýǵa shaqyrǵan. Ol Amerika Qurama Shtattaryn Lýkashenkony «ári qarai oqshaýlai túsý» úshin diplomatiiany qoldaýǵa úndedi. Onyń aitýynsha, qazir álemniń biraýyzdylyǵy men naqty áreketteri óte mańyzdy. Álem Belarýstegi daǵdarystyń aýqymyn túsinýi kerek, bul eldegi rejim dúniejúzine «belorýstardy umyttyryp jiberýge» kúsh salyp jatyr dedi Tihanovskaia.
Svetlana Tihanovskaia byltyr tamyzda Belarýste ótken prezident sailaýyna oppozitsiia atynan kandidat retinde qatysqan. Altynshy merzimge prezidenttikten úmit etip, dodaǵa túsken Aleksandr Lýkashenko birinshi týrda jeńiske jetkenin málimdegen. Sodan bastap elde uzaq ýaqyt ondaǵan myń adam qatysqan narazylyq sherýleri ótip, olar kúshtep taratyldy.
Eýropa elderiniń basym bóligi men AQSh Belarýstaǵy sailaý nátijesin moiyndamaitynyn, Lýkashenkony prezident dep tanymaitynyn málimdep, qaita sailaý ótkizýge shaqyrǵan.
Sailaýdan soń elden qashyp shyqqan Svetlana Tihanovskaia qazir Latviiada turady.
