Almatyda azamattarǵa kriptovaliýta túrinde mikrokredit usynyp, qaryz rásimdegenderge ýáde etilgen somadan az aqsha aýdarǵan internet-resýrsqa qatysty tergeý júrip jatyr, dep habarlaidy ult.kz.
Qarjylyq monitoring agenttiginiń Almaty qalasy boiynsha departamenti prokýratýranyń úilestirýimen Alemcredit.com saity arqyly jasalǵan alaiaqtyq deregin tergep jatyr.
QMA málimetinshe, yqtimal qaryz alýshylar áleýmettik jelilerdegi jarnamalar arqyly tartylǵan. Jarnamada qaryzdy tiimdi sharttarmen alýǵa bolatyny aitylǵan.
Alaida qaryz rásimdeý barysynda azamattardan jeke basyn sáikestendirý, derbes derekterin usyný jáne elektrondyq qujattarǵa qol qoiý talap etilgen. Rásim aiaqtalǵannan keiin mámileniń naqty sharttary bastapqyda kórsetilgen talaptardan aitarlyqtai ózgeshe bolǵan.
QMA resmi ókili Ernar Taijannyń aitýynsha, azamattarǵa ýáde etilgen somadan áldeqaida az qarajat aýdarylyp, onyń bir bóligi aldyn ala eskertilmegen komissiialar men basqa da tólemder retinde ustalǵan.
Sonymen qatar qaryz rásimdelmei turyp onyń tolyq quny, artyq tólem mólsheri, syiaqy men aiyppuldar týraly aqparat tolyq berilmegen.
Vedomstvo málimetinshe, qarajatty qaitarý úshin úshinshi tulǵalardyń, iaǵni dropperlerdiń bank kartalary paidalanylǵan.
Tergeý barysynda internet-resýrstyń jumysyn qamtamasyz etýge jáne qaryz alýshylarmen bailanys ornatýǵa zańdy tulǵalar, telekommýnikatsiialyq resýrstar men tehnikalyq quraldardan turatyn tarmaqtalǵan infraqurylym qoldanylǵany anyqtalǵan.
Tintý kezinde jappai SMS-habarlama taratýǵa paidalanylǵan SIM-bokstar men kóp mólsherde SIM-karta tárkilendi.
Tergeý jalǵasyp jatyr. QMA Qylmystyq-protsestik kodekstiń 201-babyna sáikes istiń ózge mán-jailary jariia etilmeitinin habarlady.
Buǵan deiin alaiaqtardyń tórt kún ishinde 150 myń SMS taratyp, azamattardyń aqshasy men jeke derekterin iemdenbek bolǵany habarlanǵan.
