Resei Qaýipsizdik keńesiniń hatshysy Nikolai Patrýshev pen FSB direktory Aleksandr Bortnikov - Ýkrainaǵa qarýmen basyp kirýdi qatty qoldaǵan adamdardyń biri. "Is júzinde prezident Vladimir Pýtindi operatsiia bastaýǵa solar sendirgen" dep jazdy britandyq The Times basylymy. Bul týraly Azattyq radiosy habarlady.
Gazet baspaǵa ázirlenip jatqan jýrnalist Oýen Mettiýzdyń kitabynan úzindi jariialaǵan. Avtordyń sózinshe, kitap Reseidiń Ýkrainaǵa basyp kirýine daiyndyǵynan habardar reseilik tulǵalardyń áńgimesine de negizdelgen.
Avtordyń tujyrymdaýynsha, Patrýshev, Bortnikov jáne olardyń kózqarasyna uqsas Resei kúshtik qurylymynyń ókilderi Ýkrainaǵa "preventivti" soqqy jasaý qajet dep sengen. Olardyń oiynsha, bul Reseidi "Batys tarabynan tóngen strategiialyq qaterden" qutqarady-mys. Aqparatqa qaraǵanda, Rosgvardiia direktory Viktor Zolotov jabylǵan "Eho Moskvy" radiostantsiiasynyń bas redaktory Aleksei Venediktovpen áńgime kezinde "Ýkraina degen memleket joq", ol tek "Amerika men Resei shekarasy arasyndaǵy" territoriia dep aitqan.
Basqynshylyqty tikelei ázirlegender arasynda Patrýshev pen Bortnikov, Pýtinnen bólek qorǵanys ministri Sergei Shoigýdyń da aty atalady. Alaida ol, kitap avtorynyń aitýynsha, ideolog emes, kei kezde ustanymyna senimsizdik bildirgen oryndaýshy rólin atqarǵan. Pýtinniń ainalasyndaǵy eń mańyzdy tulǵa retinde Patrýshev atalady. Basylymnyń jazýynsha, koronavirýs indeti kezinde oqshaýlanǵan Pýtinniń ainalasynda keńesip júrgen adamdar qatary sirep, Ýkrainaǵa baqylaý ornatý qajettigine sengen adamdar qatary kóbeigen. Sondai adamdardyń biri - kásipker Iýrii Kovalchýk.
Soǵys bastaý boiynsha túpkilikti sheshim 2021 jyly jazdyń sońynda qabyldanǵan dep aitylady. Alaida syrtqy ister ministri Sergei Lavrovqa Batystan barynsha jeńildikter alý jóninde mindet qoiylǵan. Lavrovtyń ózi jaǵdaidyń beibit órbigenin qalaǵan jáne Pýtin de sony qalaidy dep sengen.
2021 jyly jeltoqsanda Resei Batystan "qaýipsizdigine kepildik" surap, talaptar qoiǵan. Biraq Batys olardy qabyldai almaitynyn málimdegen. Alaida The Times jazýynsha, batys diplomattary, onyń ishinde britan saiasatkerleri de bar, bul tujyrymdy durys túsinbegen. Olar Resei kelissóz júrgizip, Batysty qandai da bir jeńildikter jasaýǵa kóndirýge tyrysyp jatyr dep oilaǵan. Al shyn máninde bul Reseidiń "ýltimatýmy" bolatyn.
The Times jazýynsha, Resei elitasynyń basym bóligi, tipti Qaýipsizdik keńesi músheleri de 21 aqpanǵa deiin Pýtinniń soǵys bastaýǵa bekingenin bilmegen. Pýtinniń baspasóz hatshysy Dmitrii Peskov soǵys bastalǵannan keiin jeke áńgimede Qaýipsizdik keńesi músheleriniń basym bóligine (arasynda Lavrov ta bar) atalǵan sheshim "LHR" men "DHR-dy" moiyndaý máselesi talqylanǵan otyrystan keiin ǵana aitylǵanyn jetkizgen.
Pýtinniń arnaiy operatsiia jaily málimdemesi 23 aqpanda jazylǵan dep aitylady. Ertesinde Resei Ýkrainaǵa basyp kirdi.
Resei biligi ókilderi Times basylymyndaǵy maqalaǵa orai túsinikteme bergen joq.
