Amerikanyń saiasi álemge sholý jasaityn The Hill gazeti óz saityna «Donald Tramptyń Qazaqstan prezidentimen kezdesýi - arada yntymaqtastyq ornatýdaǵy mańyzdy qadam» atty maqala jariialady, dep habarlaidy Baq.kz tilshisi.
AQSh-tyń The Hill basylymy eki el prezidentteriniń kezdesýine qatysty kólemdi maqala jariialady. Atalǵan maqalada Qazaqstan Resei men Qytai ortasynda 17 mln halyqpen derbes memleket qurǵan, Ortalyq Aziiadaǵy órkenietti el retinde sipattalǵan.
«Nursultan Nazarbaevtyń AQSh-qa sapary Qazaqstannyń Birikken Ulttar Uiymy Qaýipsizdik keńesine tóraǵalyq etken merzimimen sáikes kelip otyr. Ortalyq Aziiaǵa ádette turaqsyz ári árdaiym soǵys oty lezde burq ete túsetin aimaq retinde qaraimyz. Sol sebepti bul kezdesýde aitylar máselelerdiń mańyzy zor. AQSh-tyń burynǵy prezidenti Barak Obamanyń ákimshiligi Ortalyq Aziia jaǵdaiyna barynsha nazar aýdardy. Biraq sarapshylar eks prezidenttiń Orta Aziiamen syrtqy saiasatynyń tym álsiz bolǵanyn aitty.
Prezident Donald Tramp resmi saparmen Qazaqstan Respýblikasynyń prezidenti Nursultan Nazarbaevty, iaǵni Ortalyq Aziiadaǵy eń bedeldi, úzdik kóshbasshyny kezdesýge shaqyrdy. AQSh prezidenti men onyń komandasy Ortalyq Aziia kóshbasshysymen kezdesýdiń mańyzdy ekenin alǵa tartty. Sebebi, Nazarbaev óte jan-jaqty jáne kórshilerimen beibit qarym-qatynasty damytý barysynda óziniń istiń adamy ekenin dáleldedi», - dep jazylǵan maqalada.
Ary qarai Qazaqstannyń Resei jáne Qytai sekildi alyp memlekettermen shekaralas jatqany jáne onyń 17 mln halqy bar ekeni týraly jazylady. Eldegi gaz ben munai qorynyń kóptigi de erekshe atalyp ótken.
«Qazaqstan iadrolyq qarýdy taratpaý, zorlyq-zombylyqqa qarsy kúres jáne Aýǵanstan syndy máselelerde belsendilik tanytady. Jastaryn bilimge baýlyǵan el prezidenti óz eliniń jáne aimaqtyń turaqtylyǵy úshin eńbektenedi. Aimaqtyq forýmdar men ekijaqty kezdesýler uiymdastyrylyp, prezident Pýtin jáne Si myrzamen jylyna birneshe ret kezdesý uiymdastyryp otyrady. Nazarbaevtyń Vashingtonǵa sapary, sondai-aq onyń BUU QK otyrysyna tóraǵalyq etýi – atalǵan eldiń táýelsizdik alǵaly qanshalyqty damyǵanynyń nátijesi», - dep jazylǵan maqalada.
Tramp ákimshiligi eki kóshbasshy kezdesýiniń is-shara deńgeiinde qalyp qoimai, mańyzdy máseleler sheshiletin kelissózderge ainalýyna barynsha kúsh salǵandaryn jazyp ótken. Basylym, munymen qatar, eki eldiń bir-birinen ne kútetinderin sóz qylǵan.
Maqaladaǵy málimetke súiensek, AQSh pen Qazaqstan qaýipsizdik máselelerin jan-jaqty retteýge daiyn jáne aldaǵy ýaqytta lańkestik áreketter men terrorizmge qarsy yntymaqtastyqty kúsheitedi. Siriia men Irakta ýshyqqan lańkestik áreket ártúrli sebeppen Qazaqstanda qaitalanbaýy úshin atalǵan el derbes áskerin jan-jaqty jetildirýi tiis. Osy tusta AQSh ony qoldaýy kerek. Astana áskeri tehnikasynyń Máskeýge táýeldiligin tómendetý úshin AQSh-tyń eń úzdik áskeri tehnikasyn satyp alý arqyly Qazaqstan áskerin nyǵaita alady. Sonymen qatar, Ortalyq Aziiadaǵy eń ózekti másele – Aýǵanstandaǵy shielenisterdi sheshý úshin AQSh Qazaqstanmen birlese jumys isteýdi usynady.
Maqala sońynda Elbasynyń AQSh-qa sapary kezinde Niý-Iorkte Wall Street investorlarymen kezdesip, olardyń nazaryn Qazaqstanǵa aýdarýǵa tyrysatyny týraly jazylǵan. Munymen qatar, keibir kommertsiialyq kelisimderge qol qoiý rásimi bolyp, prezidenttiń sapary sátti bolsa, Qazaqstan óz egemendigin jan-jaqty nyǵaitýǵa qol jetkizse, AQSh-tyń Ortalyq Aziiada senimdi seriktes tabatyny týraly aitylǵan.
Budan ózge, maqala sońynda Qazaqstan týraly birqatar málimet keltirilgen. 2015 jyldan bastap Qazaqstan Dúniejúzilik Saýda Uiymyna múshe bolsa da, AQSh-pen turaqty saýda qatynasy joq. Osy másele budan bylai myqtap qolǵa alynýy tiis. AQSh myqty joba jasap, Qazaqstanmen berik bailanys ornatyp, naqty iske kirisse, eki el de shash etekten paida kóredi.
Esterińizge sala ketsek, Qazaqstan Prezidentiniń biylǵy 16-18 qańtarda Amerika Qurama Shtattaryna resmi saparmen baratyny týraly habarlaǵan bolatynbyz. Onda Nursultan Nazarbaev AQSh prezidenti Donald Tramppen, sondai-aq AQSh-tyń resmi jáne isker toptar ókilderimen kezdesý ótkizedi dep josparlandy. Qazaqstan Respýblikasy Prezidentiniń baspasóz qyzmeti Nursultan Nazarbaevtyń AQSh-qa barǵan sátinen video jariialady. Elbasyn Donald Tramptyń ózi qarsy alyp, muny úlken mártebege balady.
Aq úide ótken kezdesýde Nazarbaev Qazaqstan men AQSh arasynda árdaiym ekijaqty saiasi qarym-qatynas ornaǵanyn aityp ótti. Budan keiin Memleket basshysy AQSh-tyń isker toptar ókilderi, AQSh-tyń energetika ministri jáne «Sheteldik jeke investitsiialar jónindegi Korporatsiia» memlekettik agenttiginiń prezidentimen kezdesti. Sapar sońynda Nazarbaev Tramppen júrgizgen kelissózdiń qorytyndysy boiynsha BAQ úshin brifing ótkizdi.
