Dintashýy ǵalymnyń aitýynsha, "Qazaqstan Respýblikasynyń keibir zańnamalyq aktilerine ekstremizmge jáne terrorizmge qarsy is-qimyl máseleleri boiynsha ózgerister men tolyqtyrýlar engizý týraly" zań jobasy aiasynda qarý-jaraq ainalymyn baqylaýdy kúsheitý sharalaryn qolǵa alǵan durys. Alaida ekstremizm men terrorizmniń ideologiiamen tyǵyz bailanysty ekenin umytpaý qajet. Sondyqtan osy saladaǵy jumysty qoǵam sanasyn tárbieleý turǵysynda da júrgizgen jón, dep xabarlaidy Baq.kz tilshisi.
"Bul jerde terrorlyq aktini aldyn alýǵa bailanysty baptar ǵana qarastyrylǵan. Al ekstremizm, shekten shyǵý, qoǵamnyń arasyna iritki salý, adamdardy qatygezdikke tárbieleý ideologiiasyna qarsy jumys qarastyrylmaǵan. Menińshe, osy jaǵyn qoǵam kútip otyr. Endi, qarý-jaraqty baqylaý jáne taǵy basqa máseleler jaqsy nárse, adamnyń sanasy ekstremizm men terrorizmge daiyn bolsa, adam terrorlyq aktini jasaimyn degen niette bolsa, oǵan qarý-jaraqtyń qajeti joq. Eýropada ne bolǵanyn jaqsy bilemiz. Ony júk kóligimen de jasaýǵa bolady. Jarylǵysh zattardy qoldan da jasaýǵa bolady. Sondyqtan osy jaǵyn retteý kerek. Qoǵam sony kútip otyr", - deidi Q.Joldybai.
Aita keteiik, "Qazaqstan Respýblikasynyń keibir zańnamalyq aktilerine ekstremizmge jáne terrorizmge qarsy is-qimyl máseleleri boiynsha ózgerister men tolyqtyrýlar engizý týraly" zań jobasy aiasynda ekstremistik jáne terroristik qylmystar úshin jazalaý sharalaryn kúsheitý, qarý-jaraqtyń zańsyz ainalymy, zańsyz kóshi-qon jáne esirtki biznesi salasyndaǵy qylmystar boiynsha balama tergeýdi engizý, atýǵa daiyn turǵan qarý-jaraq satýǵa tyiym salý, qarý-jaraq, oq-dári men jarylǵysh zattary bar nysandaryn kúzetetin uiymdarǵa erekshe talatar belgileý, qarý-jaraq ainalymyna, ony saqtaý tártibine baqylaýdy kúsheitý, sonyń ishinde azamattyq jáne qyzmettik qarý-jaraq pen oq-dárilerdiń ainalymy salasynda jumys isteitin, sondai-aq kúzet qyzmetin júzege asyratyn kásipkerlik sýbektilerdi memlekettik baqylaýdyń erekshe tártibin qolǵa alý, ekstremizm men terrorizmge yqpal etetin dini toptar men birlestikterdiń is-áreketterine tyiym salý, kúzet qurylymdarynyń jáne terroristik qaýip turǵysynan durys kúzekte alynbaǵan nysan ieleriniń terrorizmge qarsy is-qimyl týraly zańnamany saqtamaǵany úshin, sondai-aq arnaiy texnikalyq quraldardyń jaramsyzdyǵy úshin ákimshilik jaýapkershiligin belgileý, jeke tulǵalardy tirkeý tártibin buzǵan adamdar úshin keibir memlekettik qyzmet kórsetýge ruqsat berýdi shekteý, eldi mekenderde ómir súrýdiń sanitarlyq normalaryn belgileý, sondai-aq zańnamany buzǵan jaǵdaida sheteldikterdi elden shyǵarý úshin negizdemelerdi naqtylaýǵa baǵyttalǵan túzetýlerdi birqatar zańnamalyq aktilerge engizý sharalary qarastyrylǵan.
