Foto: aqjolgazet.kz
Ishki ister ministrliginiń kiberqylmysqa qarsy is-qimyl departamenti terrorizm týraly jalǵan aqparat taratý — qylmys ekenin eskertip, úndeý jasady, dep habarlaidy Ult.kz.
"Ishki ister ministrliginiń kiberqylmysqa qarsy is-qimyl departamenti ata-analarǵa terrorizm aktisi týraly kórineý jalǵan habarlamalardy taratýǵa jol berilmeitinin eske salady", - delingen habarlamada.
Mundai áreketter úshin Qazaqstan Respýblikasynyń Qylmystyq kodeksiniń 273-babyna sáikes qylmystyq jaýapkershilik kózdelgen.
Habarlamada aitylǵandai terrorizm aktisi týraly kórineý jalǵan habarlamalar qoǵamdyq qaýipsizdikke naqty qater tóndirip, adamdardy jappai evakýatsiialaýǵa, memlekettik organdardyń, bilim berý, meditsina jáne basqa da áleýmettik nysandardyń qalypty jumysynyń buzylýyna ákep soǵady. Sonymen qatar tótenshe jaǵdai qyzmetteriniń eleýli kúshteri men quraldaryn negizsiz jumyldyrýǵa sebep bolady.
Kiberqylmysqa qarsy is-qimyl departamenti bul qylmysty jasaǵany úshin zańnamada bas bostandyǵynan aiyrýǵa deiingi jaza qarastyrylǵanyn eske salady.
"Osyndai barlyq habarlama mindetti túrde tekseriledi, al olardy taratqan tulǵalar zamanaýi tsifrlyq jáne tehnikalyq quraldardy paidalaný arqyly anyqtalady", - deidi IIM.
Kiberqylmystardyń aldyn alý úshin azamattarǵa:
tekserilmegen aqparatty taratpaý;
internette, áleýmettik jeliler men messendjerlerde jalǵan qońyraýlar men habarlamalar jasamaý;
balalarǵa terrorizm aktisi týraly kórineý jalǵan habarlamalar úshin ata-analardyń jaýapkershiligi bar ekenin túsindirý;
qaýip tóndiretin habarlamalar alǵan jaǵdaida quqyq qorǵaý organdaryna dereý habarlaý usynylady.
Politsiia azamattardy zań talaptaryn saqtaýǵa jáne tsifrlyq keńistikte jaýapkershilikpen áreket etýge shaqyrady.
