Qazaqstandyq Zarina Diias Nottingem (Ulybritaniia) WTA 250 týrniriniń úshinshi ainalymyna shyqty, dep habarlaidy "Ult aqparat".
Álemniń 93-inshi, osy dodanyń 16-raketkasy Z.Diias jarysty birden ekinshi ainalymnan bastap, dúniejúzilik reitingide 151-orynda turǵan aýstraliialyq Lizett Kabreramen kezdesti.
Birinshi partiiada breik jasaǵan aýstraliialyq tennisshi sol basymdyǵynan aiyrylǵan joq – 6:4.
Ekinshi sette esep 1:1 bolǵan mezette L.Kabrera taǵy bir breik jasap ketti. Degenmen Zarina sol boida tarazy basyn teńestirdi – 2:2. Esep 4:3 bolǵanda, taǵy bir breikke qol jetkizdi – 5:3. Sodan keiin setke dop bergende, múmkindigin paidalana aldy – 6:3.
Úshinshi, sheshýshi partiiada esep 2:2 bolǵan mezette qazaqstandyq sportshy breik jasap, óz geimin de ala bildi – 4:2. Aqyry matchty jeńispen túiindedi – 6:4. Tartysty báseke 2 saǵat 9 minýtqa sozyldy.
Zarina Diias júlde qory 235 myń AQSh dollarynan asatyn jarystyń shirek finalyna shyǵý úshin álemniń 46-raketkasy, qytailyq Chjan Shýai nemese reitingide 169-satydaǵy taǵy bir aýstraliialyq Arina Rodionovanyń bireýimen talasady.
Tennisshiler úshin Ýimbldon týrniri qarsańyndaǵy daiyndyq kezeńi bolyp sanalatyn Nottingem dodasy 13 maýsymda márege jetedi.
