Qazaqstandyq Mihail Kýkýshkin Astana Open ATP 250 týrniriniń ekinshi ainalymyna shyqty, dep habarlaidy "Ult aqparat".
Dúniejúzilik reitingte 91-orynda turǵan M.Kýkýshkin álemniń 76-raketasy, argentinalyq Federiko Delbonispen kortqa shyqty.
Óz eliniń quramasy sapynda Devis kýbogynyń jeńimpazy atanǵan F.Delbonis oǵan qosa ATP týrnirlerinde eki márte top jarǵan-dy. Al M.Kýkýshkinniń 2010 jyly Sankt-Peterbýrg jarysynda úzdik shyqqany belgili.
Birinshi partiiada esep 2:1 bolǵan mezette argentinalyq tennisshi breikke qol jetkizdi – 3:1. Budan keiin M.Kýkýshkin breik jasaǵanymen, qarsylasy sol boida ese qaiyrdy. Esep 5:3 bolyp, F.Delbonis setke dop bergende, qazaqstandyq sportshy breik jasap, sosyn tarazy basyn teńestirdi. Alaida tai-breikte Delbonis sátti oinai bildi – 7:6 (7:5).
Ekinshi sette esep 3:2 bolǵanda, M.Kýkýshkin breik jasap, sol basymdylyǵyn saqtai aldy – 6:3.
Úshinshi, sheshýshi partiiada qos breik jasaǵan qazaqstandyq tennisshi esepti 5:1-ge jetkizdi. Sodan keiin úshinshi matchbolyn paidalana bildi – 6:2.
Tartysty ótken báseke 2 saǵat 32 minýtqa sozyldy.
M.Kýkýshkin ekinshi ainalymda álemniń 28-inshi, osy dodanyń 1-raketkasy, frantsiialyq Benýa Permen kezdesedi.
