Tennisten Qazaqstan quramasynyń kapitany aýysty, dep habarlaidy "Ult aqparat".
Qazaqstan tennis federatsiiasynyń prezidenti Bolat Ótemuratovtyń sheshimimen aldaǵy jyly Devis kýbogynda el quramasyna Dias Dosqaraevtyń ornyna Iýrii Shýkin jetekshilik etetin bolady.
Qazaqstan tennis federatsiiasy málim etkenindei, Bolat Jamituly Qazaqstan erler quramasyn jeti jyl boiy basqarǵan Dias Dosqaraevqa alǵysyn bildirdi.
Sonymen qatar D.Dosqaraevtyń uiymnyń vitse-prezidenti retinde kóptegen ákimshilik máselelerin sheshýge týra keletini aityldy.
Iýrii Shýkin – sport sheberi, Qazaqstan tennis federatsiiasynyń aǵa bapkeri. Qazaqstan erler quramasynyń Devis kýbogy matchtaryna ózi de qatysqan ol sońǵy alty jyl boiy jattyqtyrýshylyq jumyspen ainalysyp keledi. Ásirese, juptyq synda óner kórsetetin Andrei Golýbev pen Aleksandr Nedovesovti baptaýda.
Iu.Shýkin aldaǵy jyly 6-7 naýryzda Nur-Sultan qalasynda Qazaqstan quramasy Devis kýbogynyń irikteý matchynda Niderlandyny qabyldaǵan kezde kapitandyq tizgindi qolǵa almaq.
Aita keteiik, qazaqstandyq tennisshiler Aleksandr Býblik pen Mihail Kýkýshkinniń jańartylǵan reitingte burynǵy oryndary ózgergen joq. Sáikesinshe 56-ynshy jáne 67-satyda keledi. Al taǵy bir qazaqstandyq Dmitrii Popko 187-den 186-ǵa kóterildi.
Áielder arasynda Iýliia Pýtintseva 34-ornynda qalsa, Elena Rybakina bir satyǵa (37-ge) tómendedi. Zarina Diias burynǵy 77-ornynda keledi.
Qazirgi kezde jańa maýsymǵa daiyndalyp jatqan tennisshiler aldaǵy qańtar aiynda-aq týrnirlerge qatysa bastaidy.
