Qazaqstandyq Anna Danilina juptyq synda Aýstraliia ashyq chempionatynyń finalynda jeńilip qaldy, dep habarlaidy QazAqparat.
Danilina braziliialyq Beatris Haddad Maiiamen birge finalda álemniń juptyq syndaǵy birinshi raketkalary, chehiialyqtar Barbora Kreichikova – Katerina Siniakovamen sheberlik baiqasty.
Bul kezdesýdiń favoritteri buǵan deiin eki márte Rolan Garros, bir ret Ýimbldon jarysynyń chempiony atanyp, ótken jyly Tokio Olimpiadasy men WTA qorytyndy týrnirinde úzdik shyqqan chehiialyq jup edi.
Biyldan bastap birge oinai bastaǵan Danilina men Maiia osyǵan deiin Sidnei WTA 500 dodasynda jeńimpaz atandy.
Birinshi partiia barysynda qarsylastar eki retten breik jasady. Tai-breikte qazaqstandyq-braziliialyq jup sátti oinai bildi – 7:6 (7:3).
Ekinshi sette chehiialyqtar alǵa ketti – 2:0. Aqyry sol basymdylyqtan aiyrylǵan joq – 6:4.
Úshinshi, sheshýshi partiiada esep 2:1 bolǵan mezette qazaqstandyq-braziliialyq jup breik-pointty paidalana almady. Esesine qarsylastary mundai múmkindikti múlt jibermedi – 3:2. Taǵy bir breik – 5:2. Budan keiin Siniakova matchqa dop bergende, Danilina men Maiia qarymta qaiyryp, esepti qysqartty. Degenmen Kreichikova dop bergende, jeńis chehiialyq juptyń enshisinde ketti – 6:4.
Naǵyz finalǵa tán tartysty báseke 2 saǵat 42 minýtqa sozyldy
Osylaisha qazaqstandyqtar arasynda alǵashqy bolyp Aýstraliia birinshiliginiń finalyna deiin jetken Danilina aldaǵy dúisenbide jańartylatyn álemdik reitingide juptyq synda úzdik 25 tennisshiniń qataryna kiredi.
