قازاقستاندىق اننا دانيلينا جۇپتىق سىندا اۋسترالييا اشىق چەمپيوناتىنىڭ فينالىندا جەڭٸلٸپ قالدى, دەپ حابارلايدى قازاقپارات.
دانيلينا برازيلييالىق بەاتريس حادداد ماييامەن بٸرگە فينالدا ەلەمنٸڭ جۇپتىق سىنداعى بٸرٸنشٸ راكەتكالارى, چەحييالىقتار باربورا كرەيچيكوۆا – كاتەرينا سينياكوۆامەن شەبەرلٸك بايقاستى.
بۇل كەزدەسۋدٸڭ فاۆوريتتەرٸ بۇعان دەيٸن ەكٸ مەرتە رولان گارروس, بٸر رەت ۋيمبلدون جارىسىنىڭ چەمپيونى اتانىپ, ٶتكەن جىلى توكيو وليمپياداسى مەن WTA قورىتىندى تۋرنيرٸندە ٷزدٸك شىققان چەحييالىق جۇپ ەدٸ.
بيىلدان باستاپ بٸرگە ويناي باستاعان دانيلينا مەن ماييا وسىعان دەيٸن سيدنەي WTA 500 دوداسىندا جەڭٸمپاز اتاندى.
بٸرٸنشٸ پارتييا بارىسىندا قارسىلاستار ەكٸ رەتتەن برەيك جاسادى. تاي-برەيكتە قازاقستاندىق-برازيلييالىق جۇپ سەتتٸ ويناي بٸلدٸ – 7:6 (7:3).
ەكٸنشٸ سەتتە چەحييالىقتار العا كەتتٸ – 2:0. اقىرى سول باسىمدىلىقتان ايىرىلعان جوق – 6:4.
ٷشٸنشٸ, شەشۋشٸ پارتييادا ەسەپ 2:1 بولعان مەزەتتە قازاقستاندىق-برازيلييالىق جۇپ برەيك-پوينتتى پايدالانا المادى. ەسەسٸنە قارسىلاستارى مۇنداي مٷمكٸندٸكتٸ مٷلت جٸبەرمەدٸ – 3:2. تاعى بٸر برەيك – 5:2. بۇدان كەيٸن سينياكوۆا ماتچقا دوپ بەرگەندە, دانيلينا مەن ماييا قارىمتا قايىرىپ, ەسەپتٸ قىسقارتتى. دەگەنمەن كرەيچيكوۆا دوپ بەرگەندە, جەڭٸس چەحييالىق جۇپتىڭ ەنشٸسٸندە كەتتٸ – 6:4.
ناعىز فينالعا تەن تارتىستى بەسەكە 2 ساعات 42 مينۋتقا سوزىلدى
وسىلايشا قازاقستاندىقتار اراسىندا العاشقى بولىپ اۋسترالييا بٸرٸنشٸلٸگٸنٸڭ فينالىنا دەيٸن جەتكەن دانيلينا الداعى دٷيسەنبٸدە جاڭارتىلاتىن ەلەمدٸك رەيتينگٸدە جۇپتىق سىندا ٷزدٸك 25 تەننيسشٸنٸڭ قاتارىنا كٸرەدٸ.
