Qazaqstannyń birinshi, álemniń 50-raketkasy Aleksandr Býblik jańa maýsymdy Antaliiada bastaidy, dep habarlaidy "Ult aqparat".
Júlde qory 300 myń eýroǵa baǵalanǵan Antaliia ATP 250 týrniri 7-13 qańtar aralyǵynda ótedi.
Qazaqstandyq tennisshi alǵashqy ainalymda dúniejúzilik reitingte 76-orynda turǵan italiialyq Salvatore Karýzomen kúsh synasady.
Taǵy bir qazaqstandyq, reitingte 776-satyda turǵan Andrei Golýbev irikteý saiystarynyń jartylai finalynda álemniń 313-raketkasy, slovakiialyq Aleks Molchanmen sheberlik baiqasady. A.Golýbev A.Molchannan keiin taǵy bir tennisshini utsa, ol da negizgi týrnirge joldama alady.
Sonymen qatar A.Býbliktiń 31 qańtar – 6 aqpan aralyǵynda ótetin Melbýrn dodasyna qatysatyny da belgili boldy. Biyl bul týrnir Adelaidadaǵy dodanyń ornyna ótedi. Al 8 aqpanda «Úlken dýlyǵanyń» biylǵy alǵashqy dodasy – Aýstraliia ashyq chempionaty bastalady.
Eske sala keteiik, budan buryn qazaqstandyq tennisshilerdiń Ábý-Dabi týrnirindegi qarsylastary belgili bolǵanyn jazǵan edik.
Bul týrnirdiń irikteý satysynda Anna Danilina qytailyq Ian Chjaosiýanmen kortqa shyqty. Qazaqstandyq tennisshi birinshi partiiada 6:3 esebimen utqanymen, sol qarqynyn jalǵastyra almady. Qalǵan eki sette qytailyq sportshy 7:6 (7:4), 6:4 esebimen jeńiske jetti. Osylaisha A.Danilina negizgi dodadan tys qaldy.
