«Teńizshevroildan» ekologiialyq zańnamany buzǵany úshin 726 mln-nan astam teńge óndirildi, dep habarlaidy "Ult aqparat".
Atyraý oblysy boiynsha ekologiia departamenti baspasóz qyzmetiniń málimetinshe, buǵan deiin «Teńizshevroil» JShS-ne qatysty ekologiialyq zańnamanyń saqtalýy boiynsha baqylaý sýbektisine (obektisine) barý arqyly profilaktikalyq baqylaý jáne jospardan tys tekserý júrgizilgen. Nátijesinde kompaniia tarapynan qorshaǵan ortaǵa lastaýshy zattar shyǵaryndylaryn, onyń ishinde alaý qondyrǵylarynda gaz jaǵý saldarynan normativten tys emissiialar júzege asyrylǵany anyqtalǵan.
«Osyǵan bailanysty «Teńizshevroil» JShS-ne elimizdiń ekologiialyq zańnamasyn buzý nátijesinde keltirilgen zalaldardy óteý týraly 145 988 808 teńge, 60 985 880 teńge jáne 519 477 172 teńge kóleminde nusqamalar berildi. Alaida, «Teńizshevroil» JShS tarapynan joǵaryda kórsetilgen nusqamalar erikti túrde oryndalmady. Sol sebepten,departament Nur-Sultan qalasynyń sotyna «Teńizshevroil» JShS-nen memleket kirisine zalaldardy óndirip alý týraly talap aryzben júgindi. Nur-Sultan qalalyq sotynyń 2020 jylǵy 21 qazandaǵy jáne 2 qarashadaǵy sheshimderimen departamenttiń «Teńizshevroil» JShS-ne qatysty talap aryzdary qanaǵattandyryldy», - dep habarlady departamentttiń baspasóz hatshysy Aslan Jeńisuly.
«Teńizshevroil» JShS sot sheshimderimen kelispegen. Sóitip, departamenttiń nusqamalary men sot sheshimderiniń kúshin joiý, talap-aryzdardy qanaǵattandyrýdan bas tartý, jańa sheshimderdi qabyldaý týraly apelliatsiialyq shaǵym bergen. QR JoǵarǵySotynyń mamandandyrylǵan sot alqasy «Teńizshevroil» JShS-niń apelliatsiialyq shaǵymdaryn qanaǵattandyrýdan bas tartqan. Sot sheshimderi zańdy kúshine endi. «Osylaisha, «Teńizshevroil» JShS-nen jalpy somasy 726 451 860 teńge kóleminde joǵaryda atalǵan zalaldar memleket kirisine óndirip alyndy», - dedi Aslan Jeńisuly.
Eske sala ketelik, budan buryn kúkirti mol gazdy jaqqan «Embimunaigaz» AQ-dan 1,3 mlrd teńge óndirilgenin jazǵan bolatynbyz.
