Mańǵystaý oblysynyń Shetpe aýylynan shyqqan 20 jastaǵy Áset Jańabai áskeri oqý-jattyǵý kezinde Kaspii teńizine ketken sarbazdardyń qatarynda bolǵan, dep habarlaidy ult.kz.
Onyń sońǵy kúnderi týraly Sputnik.kz tilshisine ápkesi aityp berdi.
Áset Otan aldyndaǵy boryshyn ótep, 3 qazanda aýylyna oralýy kerek bolǵan. Alaida ol týǵan kúnine bes kún qalǵanda qaiǵyly jaǵdaiǵa tap boldy.
Ápkesiniń aitýynsha, jas sarbaz oqý-jattyǵýǵa attanar aldynda týystarymen qoshtasyp úlgergen.
«Demalysqa bir kúnge jibergen eken. Sonda: “Mamaǵa baraiynshy, kórip qaitaiynshy” dep suranǵan. Sol kúni úige kelip, barlyq týysymyzben qoshtasyp ketken eken. Jaryǵymdy sońǵy kórýimiz sol boldy», – deidi marqumnyń ápkesi.
Áset teńizdegi oqý-jattyǵý týraly oqiǵaǵa deiin tórt-bes kún buryn aitqan. Júzýdi bilmeitinin aitqan týystary alańdaǵanda, ol: «Men jaǵasynda júremin ǵoi», – dep jaýap bergen.
Ápkesiniń sózinshe, Áset adamdarmen tez til tabysatyn, dostary kóp bolǵan.
«Qyrshynnan ketti… Qaiteiin, amalym bar ma? Inimniń dostary kóp bolatyn. Adamdarmen tez tildesip ketýshi edi. Jasyna qaramai, bárin “dosym” deitin», – deidi ol.
Aita keteiik, áleýmettik jelilerde Aqtaýdaǵy áskeri oqý-jattyǵý kezinde qaza tapqan sarbazdardyń birine tiesili degen videony basqa áskeri qyzmetshi túsirgeni anyqtaldy.
