Atyraý oblysynyń Teńiz ken ornyndaǵy jarylys qubyrdyń flanetsti qosylysynyń úzilýinen bolǵan. Bul týraly oblystyq tótenshe jaǵdailar departamentiniń qoǵammen bailanys bóliminen málim etti, dep habarlaidy QazAqparat.
Búgin, 6 shildede jergilikti ýaqytpen saǵat 9:55-te Teńiz ken ornynda jarylys bolyp, eki adam qaza tapqanyn habarlaǵan bolatynbyz.
Jarylys Jylyoi aýdanynyń ortalyǵy – Qulsary qalasynan 150 shaqyrym qashyqtaǵy Teńiz ken ornynda bolǵan. Jarylystyń saldarynan úsh adam jaraqat alǵan.
«Teńiz ken ornyndaǵy 3-býyn zaýytynyń 42-ýchaskesinde gidrotest júrgizý kezinde qubyrdyń flanetsti qosyndysy úzilgen. Atalǵan jobany iske asyratyn merdiger kompaniia – «Senimdi Qurylys» JShS-de jumys isteitin 1985 jylǵy er adam oqiǵa ornynda qaza tapty. Keiin «Teńizshevroil» JShS-ne qarasty meditsinalyq klinikada «Agroprom tehnika» JShS-niń bir jumysshysy qaitys boldy. Onyń jasy – 37-de», -dep habarlady tótenshe jaǵdailar departamentiniń baspasóz qyzmeti.
Ken ornyndaǵy jarylystan úsh adam zardap shekken. Olar – Onstream Kazakhstan, «Senimdi Qurylys» jáne «Muqan servis» JShS-niń jumysshylary. Zardap shekkender – 29 jáne 26-jastaǵy er adamdar.
«Jaraqat alǵan jumysshynyń biri – Onstream Kazakhstan JShS-niń 26 jastaǵy er adam «Teńizshevroil» JShS-niń áýe kemesimen Atyraý oblystyq aýrýhanasyna jetkizildi. Qazir naýqastyń jaǵdaiy aýyr dep baǵalanyp otyr. Naýqas oblystyq aýrýhananyń hirýrgiia bólimshesine jatqyzyldy», - dep málim etti departamenttiń baspasóz qyzmetinen.
