Atyraý oblysyndaǵy Teńiz ken ornynda bolǵan órt kezinde bir tehnika janyp ketti, dep habarlaidy QazAqparat.
Búgin jergilikti ýaqytpen saǵat 16:40-ta Teńiz ken ornyndaǵy jobanyń merdigeri – «Nasar Solution» JShS-niń óndiristik tsehynan órt shyqqan. Jalyndy aýyzdyqtaýǵa TShO-nyń órt sóndirý-apattyq qutqarý qyzmetiniń qyzmetkerleri jedel jetti. Al, merdiger kompaniianyń 15 qyzmetkeri qaýipsiz jerge evakýatsiialandy.
«Jylyoi aýdanyndaǵy Teńiz ken ornynda «Nasar Solution» JShS-niń ashyq aýmaǵynda bir-birine jaqyn turǵan 20 konteiner men metall bóshkelerde, sondai-aq, plastmassa ydystarda saqtalǵan tez tutanatyn suiyq qaldyqtar janǵan. Jalpy aýmaǵy shamamen 2 800 sharshy metrdi sharpyǵan órttiń saldarynan «Car» markaly 1 júk kótergish tehnika janyp ketti. Jalyn saǵat 19:46-da oqshaýlanyp, saǵat 20:30-da sóndirildi», - dep málim etti oblystyq tótenshe jaǵdailar departamentiniń baspasóz qyzmetinen.
Órtti sóndirýge TShO-nyń órt sóndirý-apattyq qutqarý qyzmetiniń 17 qyzmetkeri men 4 tehnikasy, «COCR» JShS-niń 6 qyzmetkeri men 2 tehnikasy, oblystyq tótenshe jaǵdailar departamentiniń 12 qyzmetkeri men 2 tehnikasy jumyldy.
