Qarjy naryǵyn retteý jáne damytý agenttigi Tengri Bank-tiń litsenziiasynan aiyrylý sebebin aitty, dep habarlaidy QazAqparat.
QR Qarjy naryǵyn retteý jáne damytý agenttiginiń Banktik retteý departamentiniń direktory Oljas Qizatov Tengri Bank-tegi qandai jaǵdailar onyń jumysyn toqtatýǵa ákelip soqqanyn aitty.
2020 jyldyń basynda bank salymshylar qarajattarynyń aitarlyqtai jylystaýyn bastan keshirdi, al naýryz aiynda qarjy institýty ótimdiliktiń tiisti deńgeiin qamtamasyz etýmen bailanysty problemalarǵa tap boldy. 2020 jyldyń 1 naýryzynan bastap Tengri Bank retteýshiniń prýdentsialdyq normativterin buza otyryp, bank klientterine qyzmet ete bastady. Nátijesinde Agenttik banktiń aktsionerine (PNB) bankti 2020 jyldyń sáýir aiynyń aiaǵyna deiin kapitaldandyrý týraly qadaǵalaý talabyn jiberdi. Talap oryndalmady.
2020 jylǵy naýryzdan qyrkúiekke deiingi kezeń ishinde Agenttik bank basshylyǵy men aktsionerlerge qatysty 11 buiryq jáne bir májbúrlep qadaǵalaý sharasyn qabyldady.
«Retteýshiniń qadaǵalaýymen bank nesielerdi qaita qarjylandyrý jáne problemalyq nesielerdi jinaý boiynsha is-sharalar júrgizdi, nátijesinde banktiń mindettemeleri 26,4 mlrd. teńgege azaidy, onyń ishinde memlekettik kompaniialar aldyndaǵy qaitarylǵan mindettemeler 5 mlrd teńge», - deidi Oljas Qizatov.
Degenmen bul sharalar banktiń qarjylyq jaǵdaiyn durystaýǵa jetkiliksiz boldy.
Onyń aitýynsha, 2020 jyldyń qyrkúieginde banktiń qolda bar ótimdiligi 100 million teńgege jetpegen, al klienttiń oryndalmaǵan tólemder kólemi shamamen 8 mlrd. teńge bolǵan. Sonymen birge banktiń óz klientteri aldyndaǵy mindettemeleriniń jalpy kólemi 74 milliardtan astam teńgeni qurady.
Ol banktiń tólem qabiletsizdigin, al onyń tiimsiz biznes modeli jaǵdaidy turaqtandyrý úshin jetkilikti kiris alýǵa múmkindik bermeitinin atap ótti. Tengri bank-tiń tólem qabiletsizdigi eń aldymen nesie portfeliniń sapasynyń tómendigimen bailanysty. Litsenziia qaitaryp alynǵan kezde nesielik portfeldiń 84%-y merzimi ótken, 90 kúnnen asqan merzimi ótken nesieler barlyq nesielerdiń 62%-yn quraǵan. Agenttiktiń baǵalaýy boiynsha, Tengri Bank nesieleriniń 58% bank aktsionerlerimen jáne basshylyǵymen janama bailanysty adamdarǵa berildi jáne is júzinde qaitarymsyz boldy.
«Qarjy institýtynyń kúrdeli qarjylyq jaǵdaiyn qazaqstandyq aktsionerler arasyndaǵy korporativti daýlar qiyndatyp, keiinnen olardyń arasyndaǵy sot isine ulasty. Bankte qarajat bolmaǵan kezde jáne aktsioner Agenttiktiń bankti kapitaldandyrý jónindegi talabyn uzaq ýaqyt boiy oryndamaǵan jaǵdaida, Bank prýdentsialdyq normativterdi buzyp, Bank klientteriniń tólemderi men aqsha aýdarymdaryn oryndamaǵan. Bank basshylyǵy men aktsionerleri tarapynan týyndaityn kúrdeli jaǵdaidy túzetý múmkindiginiń joqtyǵynan bankti litsenziiasynan aiyrý týraly sheshim qabyldandy», - deidi ol.
Kepildendirilgen ótemaqyny tóleý máselesin jedel sheshý úshin Agenttik Ulttyq bankpen jáne Qazaqstandyq depozitterge kepildik berý qorymen birge jeke tulǵalardyń depozitteriniń kóp bóligin eki apta ishinde tóledi.
