Kepildik berilgen ótemdi tóleý aiasynda «Tengri Bank» AQ salymshylary jalpy somasy shamamen 14,5 mlrd teńge nemese Qazaqstannyń depozitterge kepildik berý qory (QDKBQ) mindettemeleriniń jalpy somasynyń 81,5%-yn aldy, dep habarlaidy "Ult aqparat".
25 qyrkúiekten 19 qazanǵa deiingi kezeńde 4 107 adam nemese barlyq salymshylardyń jalpy sanynyń 11 paiyzy ótem alýǵa ótinish berse, shamamen 32,5 myń adam tiisti tólemdi alýǵa ótinish bermegen. Olardyń ishinde 929 salymshynyń shottarynda, kartochkalary men depozitterindegi qaldyq somanyń kólemi bir million teńgeden asatyn bolsa, 1 291 adamnyń – 100 myń teńgeden milllion teńgege deiin, 5 723 adamnyń myń teńgeden 100 myń teńgege deiin aqshasy bar.
Osyǵan bailanysty Qazaqstannyń depozitterge kepildik berý qory «Tengri Bank» AQ salymshylaryna Eýraziialyq banktiń jeke tulǵalarǵa qyzmet kórsetetin bólimshelerine júginýge keńes beredi. Agent banktiń barlyq qalalardaǵy filialdary men bólimsheleriniń mekenjailary, sondai-aq olardyń jumys tártibi www.eubank.kz resmi saitynda qoljetimdi. Ótinish berý merzimi – 2021 jyldyń 30 qyrkúiegine deiin.
Salymshylar kepildik berilgen ótem alýdyń ózderine yńǵaily kez kelgen tásilin: agent banktiń kassasynan qolma-qol aqshamen, aqshany agent banktegi bank shotyna aýdarý nemese kez kelgen basqa bank arqyly alýdy tańdaýǵa quqyly. Sonymen qatar agent banktiń kartochka shyǵarý jáne ony tegin jetkizýge ótinish berý boiynsha optsiiasyn paidalanýǵa bolady.
Agent bankke júgingen kezde salymshy jeke basyn kýálandyratyn qujat usynyp, tólem alýǵa ótinish toltyrsa, jetkilikti. Ózine tiisti senimhat rásimdelgen basqa adam da salymshynyń ornyna ótinish bere alady.
Eýraziialyq bank saitynan kepildik berilgen ótem somalary men bólimshelerdiń jumysbastylyǵyn tekserý boiynsha onlain-servisterdi paidalaný arqyly agent bankke kelýdi aldyn ala josparlaýǵa múmkindik bar.
Eske sala ketsek, «Tengri Bank»-te ashylǵan depozitterinde, aǵymdaǵy jáne kartochkalyq shottarynda aqshasy bar jeke tulǵalar men dara kásipkerler ótem alýǵa ótinish bere alady. Bul rette agent bankte kepildik berilgen maksimaldy soma sheginde barlyq salymshylarǵa aqsha qarastyrylǵan: teńgedegi jinaq depozitter boiynsha – 15 mln teńgeden; teńgedegi basqa depozitter boiynsha – 10 mln teńgeden; shetel valiýtasyndaǵy depozitter boiynsha – valiýta balamasynda 5 mln teńgeden aspaidy (bank litsenziiasynan aiyrylǵan kúni – 18 qyrkúiekte belgilengen valiýta aiyrbastaý baǵamy boiynsha).
Aita keteiik, zańdy tulǵalardyń depozitterge mindetti kepildik berý júiesine qatysýshy bankterde, onyń ishinde Tengri Bank» AQ-ta ornalasqan aqshalary QDKBQ kepildigimen ótelmeidi. Zańdy tulǵalar ótem alý úshin bankti májbúrlep taratý týraly sot sheshimi zańdy kúshine engen soń, banktiń taratý komissiiasyna júgine alady.
