Álemdik qarjy naryqtaryndaǵy jaǵdai óte turaqsyz bolyp qalýda. Eýropadaǵy qaqtyǵystyń tez arada sheshilmei, jaǵdaidyń ýshyǵýynyń arty taýar, valiýta jáne qor naryǵyna qatty áser etip jatyr, dep habarlaidy Ulttyq banktyń baspasóz qyzmeti.
Halyqaralyq aktivterge qatysty sanktsiialar Resei Federatsiiasynyń Ortalyq bankin rýbldiń qubylmalylyǵyn tómendetý úshin dástúrli valiýtalyq interventsiialar júrgizý múmkindiginen aiyrdy. Munyń saldarynan baǵamdy turaqtandyrý maqsatynda Resei Qarjy ministrligi rezident eksporttaýshylardy ishki naryqtaǵy valiýtalyq kirisiniń 80%-yn satýǵa mindettedi.
Bul rette engizilgen sanktsiialar men Resei bankterin SWIFT júiesinen ajyratý rýbldik valiýta naryǵyn rezidentterdiń (Máskeý birjasy) qatysýymen ishki naryqqa jáne jahandyq naryqqa bóldi. Olardyń arasyndaǵy baǵa belgileý ártúrli bolýda. Rýbl baǵamynyń negizgi baǵdarshysy bolyp tabylatyn Máskeý birjasyndaǵy rýbldiń birjalyq baǵamy keshe bir AQSh dollary úshin 105 rýbl deńgeiinde jabyldy.
Rýbl aitarlyqtai qubylmaly bolyp, kóbinese naryq yqpalyna jáne táýekel-sentimenttiń ózgerýine ushyrap, irgeli faktorlardy az dárejede kórsetti.
Rýblmen salystyrǵanda teńgeniń qubylmalylyǵy aitarlyqtai tómen kórsetkishterdi kórsetýde. Alaida, Resei Qazaqstannyń negizgi saýda áriptesi ekenin eskere otyra teńge baǵamyn belgilegende rýbldiń yqpaly aiqyn baiqalady.
"Ishki valiýta naryǵyndaǵy ahýaldyń turaqsyzdanýyna jol bermeý úshin dúisenbi, 28 aqpan Qazaqstan qor birjasynda dollar-teńge juby boiynsha saýda-sattyq frankfýrttyq aýktsion nysanynda ótkizildi. Onyń qorytyndysy boiynsha Ulttyq Banktiń valiýtalyq interventsiialary 98,1 mln AQSh dollaryn nemese bir kúngi saýda-sattyqtyń jalpy kóleminiń 61,5%-yn qurady. Seisenbiden bastap saýda-sattyq shtattyq rejimde ótýde. 1-5 naýryz aralyǵynda valiýtaǵa suranystyń ósýine bailanysty Ulttyq Bank 534,3 mln AQSh dollaryn satty. Bul jalpy saýda-sattyq kóleminiń 60%-yn (Nur-Sultan ýaqyty boiynsha saǵat 15-00-de) quraidy, al onyń 414,3 mln somasy Ulttyq qordan respýblikalyq biýdjetke transfertterdi qamtamasyz etý úshin konvertatsiialaýdy jáne 120 mln somasy valiýtalyq interventsiiany qurady.
Ulttyq Bank aiyrbastaý baǵamynyń erkin ózgerý qaǵidattaryn ustanýdy jalǵastyrady. Teńge baǵamy budan bylai da irgeli faktorlardyń áserinen qalyptasatyn bolady. Bul rette qysqa merzimdi perspektivada teńgeniń qubylmalylyǵy sanktsiialyq ritorikaǵa, ishki qatysýshylardyń kútýlerine jáne álemdik naryqtaǵy serpinge bailanysty bolady" - delingen habarlamada.
