Temirtaý qalasynyń ekologiialyq ahýalyn jaqsartýǵa qatysty keshendik jospardyń jobasy tanystyryldy, dep habarlaidy "Ult aqparat" Qaraǵandy oblysy ákimdiginiń baspasóz qyzmetine silteme jasap.
Temirtaýdyń ekologiialyq ahýalyn jaqsartýǵa qatysty másele bilik, biznes, qoǵam, ekologtar jáne halyqaralyq sarapshylar ókilderiniń kezdesýi barysynda talqylandy.
«Biz birneshe ret kezdesip, birlese otyryp Temirtaýdaǵy ekologiiany jaqsartý máselelerin talqylaǵan bolatynbyz. Memlekettik organdar, táýelsiz ekologtar, bastamashy toptardyń músheleri engen jumys toby qurylǵan bolatyn. Jaǵdaidy zertteý boiynsha belgili-bir jumystar júrgizildi, sonyń nátijesinde ekologiialyq jaǵdaidy jaqsartýdyń keshendik josparynyń jobasy quryldy - biz búgin ony ortaǵa salyp otyrmyz», - dedi Qaraǵandy oblysynyń ákimi Erlan Qoshanov kezdesý barysynda.
Aimaq basshysy Qazaqstannyń ekologiialyq uiymdar qaýymdastyǵyna qorshaǵan ortanyń problemalaryn sheshýge atsalysqany úshin alǵysyn bildirdi. Astanadaǵy qoǵamdyq uiymnyń kómegine Temirtaý turǵyndarynyń bastamashy toptary júgingen bolatyn. Olar qaladaǵy nashar ekologiialyq jaǵdaidy aityp shaǵym jasaǵan.
Keshendik jospar úsh jyldyq merzimge shaqtalǵan - 2020 jylǵa deiin. Ol 8 bloktan quralady, onyń árqaisysy naqty sharalardan turady. Baǵyttar ártúrli: qorshaǵan ortanyń jaǵdaiyn baqylap, kógaldandyrýdan basap, óndiristik jabdyqtardy qalpyna keltirý men qaldyqtardy basqarý jaǵy qarastyrylǵan. Basty maqsat - ónerkásiptik qalany taza jáne turǵyndar densaýlyǵy úshin qaýipsiz etý.
Joba jasaýshylardyń esebi boiynsha keshendik jospardyń barlyq sharalaryn júzege asyrý 50 mlrd teńgeden astam qarajatty qajet etedi. Ony túrli kózderden qarjylandyrý josparlanyp otyr. Respýblikalyq, oblystyq jáne jergilikti biýdjetten, kásiporynnyń investitsiialary men jeke qarajattary, BUU DB nesieleri men granttaryn tartý kózdelgen.
Qaladaǵy qorshaǵan ortany basty lastaýshy «ArselorMittal Temirtaý» kompaniiasy úsh jylda tabiǵatty qorǵaý sharalaryna 6,5 mlrd teńge berýdi josparlap otyr. Jasyl beldeýdi damytý blogynda tek aǵash otyrǵyzý ǵana emes, sonymen qatar Temirtaýdyń dendrologiialyq josparyn qurý qarastyrylǵan.
Dóńgelek ústeldiń qatysýshylary jobaǵa qatysty óz pikirlerin aityp, usynystaryn engizdi.
«Bul sońǵy nusqa emes, jospardyń jobasy áli de ashyq. Sizdermen birge tolyqtyratyn bolamyz», - dep atap ótti Erlan Qoshanov.
Aimaq basshysy keleshekte osyndai keshendik josparlar oblysymyzdyń barlyq ónerkásiptik qalalarynda da qurylatynyn atap aity.
Qaraǵandy oblysynyń ákimdigi jáne Qazaqstannyń ekologiialyq uiymdarynyń qaýymdastyǵy ózara áriptestik týraly memorandýmǵa qol qoidy.
Esterińizge sala keteiik, qysta Temirtaýda qara tústi qar jaýyp, soǵan bailanysty qoǵamdyq rezonans týyndaǵan edi. Ákimshilik ókilderi máseleden shet qalmady. Oblys ákimdiginde ekologiialyq jaǵdaidy zertteýge qatysty jumys toby qurylyp, jaǵdaidy jaqsartýdyń keshendik jospary quryla bastady.
