Temirtaýda tehnogendik sipattaǵy tótenshe jaǵdai jariialanbaq. Bul týraly qala ákimi Qairat Begimovtiń qaýlysy «Ashyq» NQA saitynda ashyq talqylaýǵa shyǵaryldy, dep habarlaidy QazAqparat.
«Temirtaý qalasynyń aýmaǵynda jergilikti aýqymdaǵy tehnogendik sipattaǵy tótenshe jaǵdai jariialansyn. Ony joiý sharalaryna Temirtaý qalasy ákiminiń orynbasary V.M.Tsai jetekshi bolyp taǵaiyndalsyn», - deligen qaýlyda.
Bul sheshimge qatysty Temirtaý qalasy ákimdiginiń baspasóz hatshysy Gúlnur Ábdiǵalieva túsinikteme berdi.
«Temirtaý qalasyndaǵy №2 jylý magistralinde jóndeý jumystaryn júrgizý qajettiligine bailanysty jergilikti aýqymdaǵy tótenshe jaǵdaidy jariialaý týraly másele kópshilik talqylaý úshin shyǵaryldy. Qys mezgilinde ataǵan jylý magistralinde apat boldy. Ázirge qalada tótenshe jaǵdai engizilgen joq. Eger engizilgen jaǵdaida qalada ystyq sý bolmaidy», - dep málim etti ákimdiktiń baspasóz hatshysy.
Gúlnur Ábdiǵalievanyń aitýynsha, jóndeý jumystary kúzge deiin jalǵasýy múmkin. Sondyqtan ol ystyq sý da shamamen sol kezge deiin bolmaitynyn jetkizdi.
