Foto: ashyq derekkóz
Jýrnalist Janat Moldashova áleýmettik jelidegi paraqshasynda Atyraý oblysynda bolǵan rezonansty tragediiaǵa qatysty jańa beinejazba jariialady, dep habarlaidy Ult.kz Politico.kz saityna silteme jasap.
Jýrnalistiń aitýynsha, aýyr qasiretke ushyraǵan otbasy áli de qaiǵydan es jiia almai otyr. Al Jangeldin aýylynyń turǵyndaryn úrei bilegen.
«Qaraly otbasy bul jaýyz qylmystan keiin óz-ózine kele almai jatyr. Jangeldin halqy qatty alańdaýly. Aǵaiyn-týys qaskói qylmyskerdi tezirek ustaýdy talap etýde. “Marqumdar saraidan qalai tabyldy? Buǵan deiin tintý júrgizilgen emes pe?” degen suraqpen myńdaǵan adam habarlasyp jatyr», – dep jazdy Janat Moldashova.
Onyń aitýynsha, oqiǵa bastalǵaly beri qasynda júrgen, marqum Maqsot Qarabalinniń inisi Shalqar Muqanǵaliev birqatar saýaldarǵa jaýap bergen.
«Bul – óte aýyr jaǵdai. Biraq bul jeke otbasynyń ǵana emes, búkil qoǵamnyń tragediiasyna ainalǵan soń, aitylýy da, jazylýy da kerek. Qara jamylǵan otbasynyń týystaryna qandai jubatý sóz aitaryńdy da bilmeisiń», – dep qosty jýrnalist.
Osy jazbadan keiin Janat Moldashova marqum Maqsot Qarabalinniń inisi Shalqar Muqanǵalievpen bolǵan suhbattyń videosyn jariialady.
Shalqar Muqanǵalievtiń aitýynsha, marqum Násip Óteshqalievanyń týystar chatyna jibergen aýdio habarlamalary bar.
«Násip jeńgemizdiń aǵaiyn-týystarynyń chatyna joldaǵan aýdiosy saqtalǵan. Sol habarlamalardyń birin 7 qarasha kúni jibergen. Kúdik týdyrmas úshin ádeii jiberilgendei áser qaldyrady. Qalai bolǵanda da, ol habarlamalardy bireý joldap otyrǵan. Qazir barlyq telefon Sultanda bolǵany aitylyp jatyr. Sol sebepti aýdiolardy da Sultan jibergen bolýy múmkin dep oilaimyz», – dedi ol.
