Foto: Itai Ron/Flash90
Jeksenbi kúni Izrail ortalyǵyndaǵy úlken qiylysta júk kóligi avtobýs aialdamasyna soǵylyp, ondaǵan adam jaraqat alyp, bir adam qaza tapty. BAQ málimetinshe, politsiia muny ádeii jasalǵan shabýyl dep sanaidy. Júrgizýshi oqiǵa ornynda atyp óltirildi.
Times of Israel basylymynyń habarlaýynsha, Glilot áskeri bazasynyń janynda júk kóligi avtobýs aialdamasyna soǵylyp, bir adam qaza taýyp, 32 adam jaraqat alyp, aýrýhanaǵa jetkizildi. Bul Tel-Avivtiń soltústiginde ornalasqan Izrail Qorǵanys armiiasynyń oqý bazasy.
Altaýy aýyr halde, beseýi ortasha, jiyrmasy jeńil jaraqat alǵan, taǵy tórteýi stress alyp qalǵan, dep málimdedi dárigerler.
Times of Israel málimetinshe, jaraqat alǵandardyń kóbi qart adamdar, olar jaqyn mańdaǵy mýzeige bara jatqan kezde avtobýstan túsken. Olar 2023 jyly 7 qazandaǵy HAMAS-tyń Izrailge jasaǵan shabýylynyń jyldyǵyn atap ótýge jinalǵan. Haaretz gazetiniń jazýynsha, jedel járdem qyzmetiniń ókili bul adamdardyń áskeri bazaǵa barmaq bolǵanyn habarlady.
«Qazirgi ýaqytta oqiǵanyń mán-jaiy tekserilýde», - dep málimdedi politsiia.
Times of Israel habarlaǵandai, Tel-Aviv mańyndaǵy júk kóliginiń soǵylýy terakt bolýy múmkin degen kúdik bar.
Politsiianyń málimdeýinshe, aialdamaǵa soǵylǵan júk kóliginiń júrgizýshisi belgisiz qarýlanǵan adamdar tarapynan atyp óltirildi.
Izrail telearnalary politsiianyń aimaqty qorshaýǵa alǵanyn, al tótenshe jaǵdai qyzmetkerleri zardap shekkenderge kómek kórsetip jatqanyn kórsetti. Oqiǵa ornynda tikushaq qalyqtap turdy.
«Qazirgi ýaqytta MDA jedel járdem dárigerleri men paramedikter ondaǵan zardap shekkenderge kómek kórsetýde», - delingen Izrail tótenshe qyzmetteriniń málimdemesinde.
Buǵan deiin Izrail Iranǵa áýe soqqylaryn jasaǵanyn jazǵanbyz.
.jpg)