Semei qalasyndaǵy monitoringilik top músheleri kezekti reid barysynda shekteý sharalaryna qaramastan toi ótip jatqan meiramhanany anyqtady, dep habarlaidy "Ult aqparat".
Búginde Shyǵys Qazaqstanda koronavirýs juqtyrǵandar kóbeiip, óńir «qyzyl aimaqqa» kirgenine qaramastan karantin talaptaryna baǵynbai, toi ótkizip jatqandar áli de kezdesýde. Kásipkerler óz meiramhanalarynyń esikterin jaýyp, kelýshilerdiń avtokólikterin basqa jaqtaǵy kólik turaqtaryna qoiý syndy qýlyqtarǵa barýda. 25 qarasha kúni monitoringilik top toi júrip jatqan taǵy bir meiramhanany anyqtady.
«Meiramhananyń jumysshylary bizge esikti biraz ýaqyt ashpai turdy. Osylaisha, eki saǵattan artyq dalada júrdik. Tekserý kezinde belgili bolǵandai, úilený toiyna 100-den astam adam jinalǵan, meiramhana jumysshylaryn qosqanda 120 adamnan asady. Materialdar jinalyp, tiisti organdarǵa jiberiletin bolady», - dedi «Semei - adallyq alańy» shtabynyń jetekshisi Dariǵa Dairova.
Onyń aitýynsha, turǵyndar shekteý sharalaryn elemei, otbasylyq merekelerdi ótkizýdi jalǵastyrýda. 1 qazannan bastap Semeide 112 reid júrgizilip, 1543 biznes nysany tekserilgen. Sonyń nátijesinde 210 zańbuzýshylyq anyqtaldy.
