سەمەي قالاسىنداعى مونيتورينگٸلٸك توپ مٷشەلەرٸ كەزەكتٸ رەيد بارىسىندا شەكتەۋ شارالارىنا قاراماستان توي ٶتٸپ جاتقان مەيرامحانانى انىقتادى, دەپ حابارلايدى "ۇلت اقپارات".
بٷگٸندە شىعىس قازاقستاندا كوروناۆيرۋس جۇقتىرعاندار كٶبەيٸپ, ٶڭٸر «قىزىل ايماققا» كٸرگەنٸنە قاراماستان كارانتين تالاپتارىنا باعىنباي, توي ٶتكٸزٸپ جاتقاندار ەلٸ دە كەزدەسۋدە. كەسٸپكەرلەر ٶز مەيرامحانالارىنىڭ ەسٸكتەرٸن جاۋىپ, كەلۋشٸلەردٸڭ اۆتوكٶلٸكتەرٸن باسقا جاقتاعى كٶلٸك تۇراقتارىنا قويۋ سىندى قۋلىقتارعا بارۋدا. 25 قاراشا كٷنٸ مونيتورينگٸلٸك توپ توي جٷرٸپ جاتقان تاعى بٸر مەيرامحانانى انىقتادى.
«مەيرامحانانىڭ جۇمىسشىلارى بٸزگە ەسٸكتٸ بٸراز ۋاقىت اشپاي تۇردى. وسىلايشا, ەكٸ ساعاتتان ارتىق دالادا جٷردٸك. تەكسەرۋ كەزٸندە بەلگٸلٸ بولعانداي, ٷيلەنۋ تويىنا 100-دەن استام ادام جينالعان, مەيرامحانا جۇمىسشىلارىن قوسقاندا 120 ادامنان اسادى. ماتەريالدار جينالىپ, تيٸستٸ ورگاندارعا جٸبەرٸلەتٸن بولادى», - دەدٸ «سەمەي - اداللىق الاڭى» شتابىنىڭ جەتەكشٸسٸ داريعا دايروۆا.
ونىڭ ايتۋىنشا, تۇرعىندار شەكتەۋ شارالارىن ەلەمەي, وتباسىلىق مەرەكەلەردٸ ٶتكٸزۋدٸ جالعاستىرۋدا. 1 قازاننان باستاپ سەمەيدە 112 رەيد جٷرگٸزٸلٸپ, 1543 بيزنەس نىسانى تەكسەرٸلگەن. سونىڭ نەتيجەسٸندە 210 زاڭبۇزۋشىلىق انىقتالدى.
