AQSh-tyń ońtústigindegi Tehas shtaty Iývalde qalasyndaǵy bastaýysh mektepke qarýly shabýyl jasalyp, keminde 19 bala jáne bir muǵalim qaza boldy. Ázirge tolyq emes málimetke qaraǵanda, kúdiktini politsiia atyp óltirgen. Bul jóninde CBS agenttigi habarlady.
Resmi oryndardyń habarlaýynsha, 18 jastaǵy shabýyldaýshy Salvador Ramos bastaýysh mektepke shabýyl jasamai turyp ájesiniń úiinde oq atqan.
Jasóspirim Meksika shekarasyna jaqyn Iývalde qalasynda stýdent bolǵan.
"Ol áýeli ájesiniń úiinde oǵan oq atqan" dedi Tehas qoǵam qaýipsizdigi departamentiniń ókili Erik Estrada. Onyń sózine qaraǵanda, ájesi áýe ushaǵymen aýrýhanaǵa jetkizilgen. 66 jastaǵy áieldiń jaǵdaiy aýyr dep aitylady.
Aqparatqa qaraǵanda, ájesiniń úiinen shyqqannan keiin Salvador Ramostyń kóligi jolshybai bastaýysh mekteptiń mańyndaǵy aryqqa tyǵylǵan. Budan soń Ramos qarýymen mektepke kirip, oq atqan.
Oqiǵa seisenbi, 24 mamyrda bolǵan. Bastaýysh mektepte 7 men 10 jas aralyǵyndaǵy balalar oqidy. Shabýyl kezinde keminde 15 adam zardap shekken.
"Shabýylǵa qandai oqiǵanyń túrtki bolǵany belgisiz. Qala turǵyndary men mektep oqýshylarynyń basym bóliginiń tegi ispan. Oqýshylardyń kóbi turmysy nashar otbasylardan shyqqan" - dep jazdy The Texas Tribune saity.
Oqiǵa jaily Prezident Djo Baidenge habar berildi. Bul - shtat tarihyndaǵy eń qandy shabýyldardyń biri. 1966 jyly Tehas ýniversitetiniń munarasyndaǵy atystan 16 adam qaza bolǵan. 2018 jyly Santa Fe orta mektebindegi atystan on adam opat bolǵan.
