Foto: Sandýǵash Dúisenovadan
Tekelide kóshkin kezinde óli tabylǵan bes jasar qyzdyń anasy oqiǵanyń mán-jaiyn aityp berdi, - dep habarlaidy Tengrinews.kz.
Kóshkin 15 mamyrda saǵat 11.40 shamasynda júrgen. Shamamen, bes úi kóshkin astynda qalyp qoiǵan. Solardyń birinde bes jasar Janbota bolǵan.
"Oǵan deiin jańbyr qatty jaýdy. Men monshada bolǵanmyn. Qyzym ol kezde úide qýyrshaqtarymen oinap otyrǵan. Oǵan deiin kóshkin bolady degendi estimedik. Eshteńe kútpedik. Jaibaraqat úide otyrǵanbyz. Oqiǵadan keiin men esimnen tanyp, aýrýhanada bir-aq oiandym", - deidi Gúlnara Tileýhan.
Onyń aitýynsha, úlken qyzy ol kezde kórshi aýylda bolǵan.
Kóshkin saldarynan Gúlnara Tileýhannyń úii túgel qiraǵan. Úidi tazalaý jumystarymen TJ qyzmetkerleri ainalysyp jatyr. Búginde Gúlnaranyń otbasyna ákimdik ókilderi men turǵyndar kómektesip jatyr. Janbotanyń janazasy erteń, 17 mamyrda bolady.
Tekeli ákiminiń orynbasary Baýyrjan Tobylbaevtyń sózinshe, kóshkinnen zardap shekken barlyq otbasyna kómek kórsetiledi. Sondai-aq Tobylbaev adamdarǵa aldyn ala nege eskertý jasalmaǵanyn túsindirdi.
"Mundai oqiǵa bolatynyn eshkim kútken joq. Túni boiy jańbyr jaýdy. Úiler taýǵa jaqyn ornalasqan. Joǵaryda taǵy bir kóshe bolǵan, ol jerde de adamdar turatyn. Qazir eshqandai qaýip joq, bári birtindep úiine oralyp jatyr. Zardap shekkenderdi ýaqytsha qonaqúige ornalastyrdyq", - deidi ol.
Sondai-aq jergilikti bilik úisiz qalǵan adamdardyń turǵyn úi máselesi sheshiletinin aitty. Baýyrjan Tobylbaevtyń sózinshe, qiraǵan úiler qaita jóndeýge jaramaidy.
