Qazaqstanda memlekettik tapsyrys negizinde tegin beriletin dári-dármek pen meditsina buiymdary qatań baqylanatyn boldy. Densaýlyq saqtaý ministrligi, «Áleýmettik meditsinalyq saqtandyrý qory» KEAQ men «SQ-Farmatsiia» JShS birlesken jobasy ótken jyldyń sońynda synaqtan ótkizilgen bolatyn. Bul týraly Meditsinalyq saqtandyrý qorynyń (MSQ) baspasóz qyzmeti habarlady.
Habarlamaǵa súiensek, nobaily jobany ise asyrý barysynda 191 603 SMS-habarlama jiberildi. Sonymen qatar, abonentterden 8123 jaýap kelip, mamandar 1218 qońyraýǵa jaýap berdi.
Buǵan deiin habarlanǵandai, Meditsinalyq saqtandyrý qory byltyrdan bastap kepildendirilgen tegin kómek paketi sheńberinde beriletin dári-dármek pen meditsina buiymdaryna aqy tóleý tártibin ózgertken bolatyn. Jańa tártip boiynsha, dári qolma-qol berilgen jáne «Dári-dármekpen qamtamasyz etý» aqparattyq júiesine dáriniń berilgeni týraly belgi soǵylǵan retseptilerge ǵana aqy tólenýi tiis.
Baspasóz málimdemesine súiensek, maýsym aiynyń sońyna deiin patsientterge SMS-habarlama joldanady. Habarlama júiege 2019 jyly 1 qańtardan 30 maýsymǵa deiin tegin-dári dármek alǵandar retinde engen turǵyndarǵa jiberiledi. Jalpy alǵanda, aqparattyq júiede kórsetilgen 5,7 mln telefon nómirine habarlama jiberý josparlanyp otyr.
Habarlamada retseptiniń nómiri men dáriniń berilgen kúni kórsetiledi. Preparattar shyn máninde qolyna timegen patsientter SMS-habarlamaǵa jaýap retinde «0» tsifryn joldai alady nemese «SQ-Farmatsiia» JShS-niń 1439 bailanys nómirine qońyraý shalsa bolady. Qońyraý shalý da, SMS te – tegin.
«Habarlamany tegin dári alǵan patsientterdiń bári birdei alady deý qiyn. Sebebi, olardyń arasynda telefon nómirlerin qate kórsetkender de bolýy múmkin. Sondyqtan turǵyndarǵa habarlama kelmegen jaǵdaida «SQ-Farmatsiia» kompaniiasynyń bailanys ortalyǵyna habarlasýǵa bolatynyn eskertemiz», - dedi «Áleýmettik meditsinalyq saqtandyrý qory» KEAQ basqarma tóraǵasy Aibatyr Jumaǵulov.
MSQ respýblikalyq biýdjetten qarjylandyrylatyn tegin meditsinalyq kómek (TMKKK) paketiniń jáne jumys berýshiler, azamattar men memleket jarnasy esebinen qarjylandyrylatyn mindetti áleýmettik meditsinalyq saqtandyrý (MÁMS) paketiniń operatory. Qor 2018 jyldan bastap TMKKK paketi sheńberinde kórsetilgen meditsinalyq kómek aqysyn tólep keledi. Al, MÁMS paketi boiynsha qyzmet kórsetý 2020 jyly bastalmaq.
Dári-dármek pen meditsinalyq buiymdardy satyp alatyn «SQ-Farmatsiia» JShS men MSQ 2019 jyly 86,9 mlrd teńgege kelisimshart bekitken. Naýryz aiynyń sońyna deiin eldegi meditsina uiymdary 14 mlrd teńgege retsept jazyp bergen, sonyń ishinde 13 mlrd teńgeniń dárisi patsientter qolyna tigen.
