Tegeran qalasynda qazaqtyń uly oishyly Abai Qunanbaiulynyń murasyna arnalǵan halyqaralyq seminar ótti. «EYU ainasyndaǵy Abai oiynyń beinesi» atty is-sharany EYU Mádeniet institýty Qazaqstannyń Irandaǵy elshiligimen birlesip uiymdastyrdy, dep habarlaidy ult.kz.
2026 jylǵy 24 tamyzda ótken seminarǵa EYU-ǵa múshe memleketterdiń elshileri, laýazymdy tulǵalary men ǵalymdary qatysty.
EYU Mádeniet institýtynyń prezidenti Muhammad Hasan Abaidyń oilary Qazaqstan shekarasynan asyp, EYU keńistigindegi halyqtar úshin de mańyzdy ekenin atap ótti. Ol Abaidyń «Tolyq adam» tujyrymdamasyna toqtalyp, qoǵamnyń jańǵyrýy eń aldymen adamnyń ishki ózgerýi, etikanyń nyǵaiýy jáne dástúr men qazirgi zamannyń sabaqtastyǵymen bailanysty ekenin aitty.
Qazaqstannyń Irandaǵy elshisi Ońtalap Ońalbaev Abaidy qazirgi qazaq ádebietiniń negizin qalaýshy ári bilim, ǵylym, eńbek pen ádilettilikti nasihattaǵan álemdik deńgeidegi oishyl retinde tanystyrdy. Onyń aitýynsha, Abaidyń rýhani murasy búkil adamzatqa ortaq qundylyq ári mádeni bailanystardy nyǵaitatyn mańyzdy kópir.
Seminardyń ǵylymi bóliminde Abai shyǵarmashylyǵy túrli qyrynan talqylandy. Ál-Farabi atyndaǵy Qazaq ulttyq ýniversitetiniń professory Islam Jemenei Abaidyń ratsionalizmge, aqyl men etikanyń úilesimine negizdelgen oi júiesine toqtaldy.
Qyrǵyzstandyq zertteýshi Mehram Qurbanbekqyzy Qulbaeva Abaidyń qazaq-qyrǵyz ádebi bailanystaryndaǵy orny men «Qara sózderdiń» qoǵamdyq sanany oiatýdaǵy rólin sóz etti.
Al Irannyń Gýmanitarlyq jáne mádeni zertteýler institýtynyń dotsenti Muhammad-Amin Shahdjýi Abai murasyn «Basqa» etikasy men empatiia turǵysynan taldady. Ózbekstandyq professor Norbai Djabarov Abai shyǵarmalaryndaǵy Álisher Naýai dástúrin qarastyrdy.
Is-shara sońynda Abaidyń ómiri men shyǵarmashylyǵyna arnalǵan derekti film kórsetilip, qonaqtarǵa estelik syilyqtar tabystaldy. Qazaqstan elshisi EYU Mádeniet institýtynyń prezidentine shapan japty.
Sonymen qatar seminarǵa qatysqan elshiler men qonaqtarǵa shirazdyq jazýshy Mehdi Mirazimidiń «Bir bettik kitap» atty eńbegi tartý etildi.
