Astanada Táýelsiz Memleketter Dostastyǵy volonterleriniń alǵashqy forýmy bastaldy. Qazaqstan Prezidenti Qasym-Jomart Toqaevtyń bastamasymen qolǵa alynǵan forým TMD Úkimet basshylary keńesiniń sheshimi boiynsha Dostastyq elderiniń volonterlik bastamalaryn biriktirip, ózara tájiribe almasýǵa arnalǵan jyl saiynǵy turaqty alań retinde quryldy.
Forýmnyń saltanatty ashylýyna Qazaqstan Respýblikasy Premer-ministriniń orynbasary – Mádeniet jáne aqparat ministri Aida Balaeva, BUU Eriktiler baǵdarlamasynyń atqarýshy direktory Toili Kýrbanov, AÓSShK Bas hatshysy Qairat Sarybai, TMD Bas hatshysynyń orynbasary Nurlan Seiitimov, sondai-aq volonterlik uiymdardyń ókilderi men Dostastyq elderiniń delegatsiialary qatysty.
Forým Qazaqstan Respýblikasynyń Prezidenti Qasym-Jomart Toqaevtyń qatysýshylarǵa arnaǵan quttyqtaý sózinen bastaldy. Memleket basshysynyń quttyqtaýyn Aida Balaeva oqyp berdi.
«Osy mańyzdy basqosýdyń Birikken Ulttar Uiymy Qazaqstannyń usynysymen jariialaǵan Halyqaralyq volonterler jylynda ótýiniń máni erekshe. Bul volonterlerdiń áleýmettik, gýmanitarlyq jáne ekologiialyq máselelerdi sheshýdegi orasan eńbeginiń halyqaralyq deńgeide moiyndalǵanynyń aiqyn kórinisi.Qazaqstan osy forýmdy ótkizýdi usyna otyryp, TMD elderiniń volonterleri turaqty túrde tájiribe almasyp, ortaq bastamalaryn halyqaralyq deńgeide birlese ilgeriletetin alań qurýdy maqsat etti. Biz úshin dostyqty nyǵaityp, yntymaq, meiirimdilik pen janashyrlyq siiaqty izgi qundylyqtardy qoǵamǵa tereń sińirý airyqsha mańyzdy.
Qazaqstanda volonterlik adam áleýetin damytýǵa, azamattyq jaýapkershilikti arttyrýǵa jáne qoǵamda janashyrlyqqa negizdelgen jańa qarym-qatynas mádenietin qalyptastyrýǵa yqpal etip keledi. 1 shildeden bastap kúshine engen jańa Konstitýtsiiada elimizdiń tarihynda alǵash ret volonterlik qyzmetti memlekettik qoldaý eń joǵary quqyqtyq deńgeide bekitildi.Eriktilerdiń izgi nieti men riiasyz eńbegi – adamdarǵa jiger berip, qoǵamdy jaqsy jaqqa ózgertetin qýatty kúsh. Buǵan jalpyulttyq «Taza Qazaqstan» qozǵalysy aiqyn mysal bola alady. Bul igi bastama az ýaqyttyń ishinde kóptegen azamatty, ásirese belsendi jastardy ortaq iske jumyldyrdy. Jalpy, Eriktiler jyly aiasynda myńdaǵan is-shara ótkizildi. Búginde elimizdegi volonterler sany 300 myńǵa jýyqtady.
Osy forým elderimizdiń gýmanitarlyq yntymaqtastyǵyn odan ári damytýǵa, adamdar arasyndaǵy bailanysty, ózara senim men tatý kórshilikti nyǵaitýǵa eleýli úles qosatynyna senemin. Bizdiń basty maqsatymyz – Dostastyqty jasampazdyq pen órleý, birlik pen ózara túsinistik saltanat qurǵan ortaq keńistikke ainaldyrý.
Barsha volonterge ainalasyna beijai qaramai, árdaiym kómek qolyn sozýǵa jáne álemdi jaqsy jaqqa ózgertýge umtylyp júrgeni úshin shynaiy alǵysymdy bildiremin.
Forým jumysyna sáttilik, birlesken bastamalarǵa tabys tileimin!» – delingen Memleket basshysynyń quttyqtaý hatynda.
Aita keteiik, eki kúnge sozylatyn forýmǵa Qazaqstan, Ázerbaijan, Belarýs, Qyrǵyzstan, Resei, Tájikstan jáne Ózbekstannan 300-ge jýyq delegat qatysýda. Olardyń qatarynda memlekettik organdar men volonterlik uiymdardyń ókilderi, sondai-aq eriktiler bar.
Forým aiasynda paneldik sessiialar, taqyryptyq pikirtalastar jáne volonterlik qyzmettiń tabysty tájiribeleriniń tanystyrylymdary ótedi.
Memleketaralyq yntymaqtastyqty damytýǵa, sondai-aq ekologiia, áleýmettik jáne inkliýzivti qoldaý, jastar volonterligi baǵyttarynda birlesken bastamalardy júzege asyrýǵa erekshe nazar aýdarylady.
