Qazaq KSR-niń eńbek sińirgen ártisi, balet ártisi, horeograf ári pedagog Edýard Málbekov qaitys boldy, dep habarlaidy ult.kz.
Qazaqstan Respýblikasynyń Mádeniet jáne aqparat ministrligi óner iesiniń dúnieden ótýine bailanysty onyń týǵan-týystary men jaqyndaryna, áriptesteri men shákirtterine kóńil aitty.
Edýard Jabashuly sanaly ǵumyryn balet ónerine arnap, otandyq balettiń qalyptasýy men damýyna eleýli úles qosty. Ol sahnada «Spartak», «Baqshasarai burqaǵy», «Jizel», «Aqqý kóli», «Don Kihot», «Mahabbat týraly ańyz», «Karmen-siýita» syndy klassikalyq jáne ulttyq qoiylymdarda basty partiialardy oryndady.
Óner iesi horeografiialyq bilim berý salasynda da jemisti eńbek etti. Ustazdyq jolynda birneshe býyn ónerpazdy tárbielep, ózindik shyǵarmashylyq mektep qalyptastyrdy. Onyń shákirtteri búginde Qazaqstanda jáne shetelde qazaq balet ónerin tanytyp júr.
Ministrlik málimdeýinshe, Edýard Málbekovtiń kásibi sheberligi, ónerge adaldyǵy men shákirtterine degen qamqorlyǵy keiingi býynǵa úlgi bolyp qaldy.
Óner iesiniń jarqyn beinesi men ulttyq mádenietke sińirgen eńbegi ónersúier qaýymnyń jadynda saqtalady.
