Búgin QR Mádeniet jáne sport ministrliginde elimizdegi respýblikalyq teatrlardyń basshylary ótken jyly atqarǵan jumystary jaiynda esep berdi, dep habarlaidy QazAqparat tilshisi.
M.Áýezov atyndaǵy Qazaq memlekettik akademiialyq drama teatry direktorynyń mindetin atqarýshy Sábit Ábdiqalyqovtyń aitýynsha, teatr ujymy ótken jyldyń 11-18 shildesi aralyǵynda Frantsiianyń Avinon qalasynda ótken "Avinon-2018" halyqaralyq festivaline qatysqan.
"M.Áýezov teatry osy festivalge qazaq eliniń atynan qatysyp, óner kórsetken birinshi teatr sanalady. Festivalde belgili litvalyq rejisser Ionas Vaitkýstyń rejisserlyǵymen Iran-Ǵaiyptyń "Qorqyt" qoiylymy sahnalanyp, teatrymyzdyń betke ustar týyndysyn, shyǵarmadaǵy túrkilik mádeniettiń dominanttaryn, bai folklorlyq murasyn joǵary kórkemdik deńgeide frantsýz aýditoriiasyna pash etti. 72-shi ret ótken Avinon festivaline qatysý teatr úshin jaqsy tájiribe boldy", - dedi ol.
Al Ǵ.Músirepov atyndaǵy Qazaq memlekettik akademiialyq balalar jáne jasóspirimder teatry direktorynyń mindetin atqarýshy Azamat Satybaldy teatr repertýarynda 41 qoiylym bar ekendigin aitty.
"Onyń 29-y eresekterge arnalǵan qoiylym bolsa, 12-si balalarǵa arnalǵan ertegiler. Jalpy, qazirgi órkenietke umtylý, jan-jaqty damý kezeńinde baiyrǵy ulttyq qundylyqtarymyzdy saqtai otyryp, jańa zaman jetistikteri men ata-dástúrimizdi sabaqtastyra "Rýhani jańǵyrýǵa" jol sala bildik", - dedi Azamat Satybaldy.
Shara barysynda Respýblikalyq memlekettik akademiialyq korei mýzykalyq komediia teatrynyń direktory Liýbov Ni, Q.Qojamiiarov atyndaǵy memlekettik akademiialyq uiǵyr mýzykalyq komediia teatrynyń kórkemdik jetekshisi Murat Ahmadiev ótken jyly atqarǵan jumystary jaiynda esep berdi.
