Tájikstannyń ádilet ministrliginiń qylmystyq jazany atqarý basqarmasynyń basshysy túrmede 4 tutqynnyń pnevmoniiadan qaitys bolǵanyn rastady.
"Túrmede adam ólimi boldy. Biraq qaitys bolǵandar sanynyń artýy barlyq tutqyndar ólip jatyr degendi bildirmeidi" dedi Mansýrjon Omarov Sputnik Tájikstan saityna.
Onyń sózine qaraǵanda pnevmoniiadan qaitys bolǵan tutqyndarda diabet, júrek-qantamyr aýrýlary bolǵan.
"Basym bóligi 50-den asqan. Arasynda Qylmystyq kodekstiń 200-bap - "zańsyz esirtkimen ainalysý" baby boiynsha aiyptalǵan eki tutqyn baryn bilemin" dedi Omarov.
Buǵan deiin №1 túrmede Abdýlfaiyz Radjabov esimdi 47 jastaǵy tutqynnyń qaitys bolǵany habarlanǵan edi. Týystary onyń COVID-19 aýrýynan qaitys bolǵanyn aitady. Alaida túrme ákimshiligi muny joqqa shyǵaryp, tutqyn ólimine pnevmoniia sebep bolǵanyn aitady.
Mansýrjon Omarovtyń aitýynsha, qazir dárigerler shamamen 30 tutqynnyń jaǵdaiyn baqylap otyr. Olardyń jaǵdaiy - aýyr.
Tájikstan biligi buǵan deiin uzaq ýaqyt elde koronavirýs baryn moiyndamai kelgen. Azattyqtyń Tájik qyzmetiniń jazýynsha, azamattyq qoǵam qysymynan keiin bilik elge Dúniejúzilik densaýlyq saqtaý uiymy ókilderin shaqyrýǵa májbúr bolǵan.
DDSU sarapshylarynyń Tájikstanǵa sapary qarsańynda azamattyq qoǵam ókilderi halyqaralyq uiym ókilderin túrmedegi jaǵdaiǵa nazar aýdarýǵa shaqyrǵan. Belsendilerdiń pikirinshe, tájik túrmelerinde keibir tutqyndardy bosatyp, sanitarlyq-dezinfektsiia sharalaryn kúsheitip, koronavirýs qaýpin azaitýǵa bolady.
