تەجٸكستاننىڭ ەدٸلەت مينيسترلٸگٸنٸڭ قىلمىستىق جازانى اتقارۋ باسقارماسىنىڭ باسشىسى تٷرمەدە 4 تۇتقىننىڭ پنەۆمونييادان قايتىس بولعانىن راستادى.
"تٷرمەدە ادام ٶلٸمٸ بولدى. بٸراق قايتىس بولعاندار سانىنىڭ ارتۋى بارلىق تۇتقىندار ٶلٸپ جاتىر دەگەندٸ بٸلدٸرمەيدٸ" دەدٸ مانسۋرجون وماروۆ Sputnik تەجٸكستان سايتىنا.
ونىڭ سٶزٸنە قاراعاندا پنەۆمونييادان قايتىس بولعان تۇتقىنداردا ديابەت, جٷرەك-قانتامىر اۋرۋلارى بولعان.
"باسىم بٶلٸگٸ 50-دەن اسقان. اراسىندا قىلمىستىق كودەكستٸڭ 200-باپ - "زاڭسىز ەسٸرتكٸمەن اينالىسۋ" بابى بويىنشا ايىپتالعان ەكٸ تۇتقىن بارىن بٸلەمٸن" دەدٸ وماروۆ.
بۇعان دەيٸن №1 تٷرمەدە ابدۋلفايىز رادجابوۆ ەسٸمدٸ 47 جاستاعى تۇتقىننىڭ قايتىس بولعانى حابارلانعان ەدٸ. تۋىستارى ونىڭ COVID-19 اۋرۋىنان قايتىس بولعانىن ايتادى. الايدا تٷرمە ەكٸمشٸلٸگٸ مۇنى جوققا شىعارىپ, تۇتقىن ٶلٸمٸنە پنەۆمونييا سەبەپ بولعانىن ايتادى.
مانسۋرجون وماروۆتىڭ ايتۋىنشا, قازٸر دەرٸگەرلەر شامامەن 30 تۇتقىننىڭ جاعدايىن باقىلاپ وتىر. ولاردىڭ جاعدايى - اۋىر.
تەجٸكستان بيلٸگٸ بۇعان دەيٸن ۇزاق ۋاقىت ەلدە كوروناۆيرۋس بارىن مويىنداماي كەلگەن. ازاتتىقتىڭ تەجٸك قىزمەتٸنٸڭ جازۋىنشا, ازاماتتىق قوعام قىسىمىنان كەيٸن بيلٸك ەلگە دٷنيەجٷزٸلٸك دەنساۋلىق ساقتاۋ ۇيىمى ٶكٸلدەرٸن شاقىرۋعا مەجبٷر بولعان.
ددسۇ ساراپشىلارىنىڭ تەجٸكستانعا ساپارى قارساڭىندا ازاماتتىق قوعام ٶكٸلدەرٸ حالىقارالىق ۇيىم ٶكٸلدەرٸن تٷرمەدەگٸ جاعدايعا نازار اۋدارۋعا شاقىرعان. بەلسەندٸلەردٸڭ پٸكٸرٸنشە, تەجٸك تٷرمەلەرٸندە كەيبٸر تۇتقىنداردى بوساتىپ, سانيتارلىق-دەزينفەكتسييا شارالارىن كٷشەيتٸپ, كوروناۆيرۋس قاۋپٸن ازايتۋعا بولادى.
