Tájikstan Siriiadaǵy azamattaryn qaitarý úshin Damask jáne halyqaralyq Qyzyl Krest uiymy ókilderimen kelissóz júrgizip jatyr.
Tájikstan SIM-niń habarlaýynsha, Tájikstannyń Kýveittegi elshisi Zýbaidýllo Zýbaizoda Qyzyl Krest ókilderi jáne Siriianyń syrtqy ister ministri Faisal ál-Mikdadpen kezdesý kezinde ál-Hol lagerindegi tájik azamattaryn elge qaitarý máselesin talqylaǵan.
Aqparat boiynsha, ál-Hol men ál-Hasaka lagerinde 500-den astam tájik áieli men bala bar. Bular - "Islam memleketi" terroristik toby qatarynda soǵysqan sodyrlardyń otbasy.
2017-2018 jyldary "Islam memleketi" toby jeńilgennen keiin sodyrlardyń otbasy kúrd jasaqtarynyń qolyna túsken. Izinshe Siriianyń birneshe qalasyndaǵy bosqyndar lagerine ornalastyrylǵan. Degenmen tájik biliginiń kúrdtermen kelissóz júrgizip jatqany jaily aqparat ázirge aitylmaidy.
Osyǵan deiin Tájikstan biligi áielder men balalardy birneshe ret qaitarýǵa kúsh salǵan, biraq indetke bailanysty operatsiia keiinge shegerilgen.
Ál-Hol lagerinde turyp jatqan tájik áielderiniń biri Azattyqtyń Tájik qyzmetine tájik biliginiń talpynysyna qatty qýanatynyn jetkizgen. Ol Siriiaǵa 2014 jyly kúieýiniń nusqaýymen kelgen. Birneshe aidan soń kúieýi qaqtyǵysta qaza tapqan. Ol ózi siiaqty kúieýi qysym jasap nemese aldanyp kelgen tájik áielderiniń kóp ekenin aitqan.
Dýshanbe tájik azamattaryn qaitarý úshin Bashar Asad úkimeti ókilderimen birneshe ret kezdesken. Biraq tájik azamattary kúrdter baqylaýyndaǵy lagerlerde bolǵandyqtan jáne kúrdter Asad áskerine qaramaǵandyqtan kezdesýlerden nátije shyǵa qoimaǵan. Siriia lagerlerindegi azamattaryn evakýatsiialaǵysy keletin elder ádette diplomatiialyq etikany saqtap, Damaskige bir ret qana shyǵady. Keiinnen kúrd jasaqtarymen bólek kelissóz júrgizedi.
Ál-Hol lagerindegi áielderdiń biri qazirgi kezde Resei, Qazaqstan, Ózbekstan biliginiń lagerlerdegi azamattaryn qaitarý úshin kúrd jasaqtarymen kelissóz júrgizip jatqanyn aitqan. Qarasha aiynyń sońynda Ózbekstan úkimeti lagerdegi shamamen 100 áiel men balany qaitarý týraly kúrdtermen kelissóz ótkizgen.
Osyǵan deiin Qazaqstan men Ózbekstan Siriiadaǵy júzdegen azamatyn eline qaitarǵan.
BUU málimetinshe, Siriiadaǵy Ál-Hol lagerinde shamamen 65 myń adam turyp jatyr: 28 myńy – Siriia, 30 myńy – Irak, shamamen 10 myńy shetel azamaty. Arasynda 570 tájik bar.
