Tájikstan prezidenti Emomali Rahmon diqandardy Ramazan aiy kezinde oraza ustamai, egis alqaptarynda jumys isteýge shaqyrdy.
Tájikstan biligi elde koronavirýs baryn joqqa shyǵaryp keledi. Degenmen 23 sáýirde Rahmon oraza ustaý "juqpaly aýrý infektsiiasyna tótep berýge kedergi keltiredi" dedi.
"Elde [COVID-19] aýrýy tirkelmedi eken dep qol qýsyryp otyrýǵa bolmaidy" dedi ol.
Tájikstan koronavirýs joq dep resmi habarlaǵanmen shekaralaryn jaýyp, virýspen kúres sharalaryn júrgizip jatyr. Tájikstannyń resmi din qyzmetkerleriniń sózine silteme jasaǵan Emomali Rahmon oraza ustaý "fermerler men baqtashylarǵa, kóp jumys isteitin adamdarǵa ziiandy" dedi.
"Egis alqaptarynda jumys istep jatqan adamdardy ózderi men otbasynyń densaýlyǵyn oilap, osy ruqsatty paidalanyp, jaǵdai turaqtalǵanǵa deiin orazany shegerýge shaqyramyn" dedi ol.
Burynǵy sovet respýblikasy ǵalamdyq indet kezinde koronavirýstyń ekonomikaǵa yqpalyn azaitý úshin halyqaralyq donorlardan shuǵyl kómek suraǵan. Tájikstan importty óteý úshin shetel valiýtasymen qiyndyqqa ushyraýy múmkin. Sebebi pandemiiaǵa bailanysty Reseidegi tájik migranttarynan túsetin tabys kólemi azaiǵan.
Tájikstanda jumys kúshiniń 65 paiyzy aýyl sharýashylyq salasyna tartylǵan.
AQSh-tyń halyqaralyq din erkindigi komissiiasynyń 2019 jylǵy esebinde Tájikstan din erkindigin shektep, dini kózqarasy úshin adamdardy qýdalaityn memleket retinde atalǵan.
