تەجٸكستان پرەزيدەنتٸ ەمومالي راحمون ديقانداردى رامازان ايى كەزٸندە ورازا ۇستاماي, ەگٸس القاپتارىندا جۇمىس ٸستەۋگە شاقىردى.
تەجٸكستان بيلٸگٸ ەلدە كوروناۆيرۋس بارىن جوققا شىعارىپ كەلەدٸ. دەگەنمەن 23 سەۋٸردە راحمون ورازا ۇستاۋ "جۇقپالى اۋرۋ ينفەكتسيياسىنا تٶتەپ بەرۋگە كەدەرگٸ كەلتٸرەدٸ" دەدٸ.
"ەلدە [COVID-19] اۋرۋى تٸركەلمەدٸ ەكەن دەپ قول قۋسىرىپ وتىرۋعا بولمايدى" دەدٸ ول.
تەجٸكستان كوروناۆيرۋس جوق دەپ رەسمي حابارلاعانمەن شەكارالارىن جاۋىپ, ۆيرۋسپەن كٷرەس شارالارىن جٷرگٸزٸپ جاتىر. تەجٸكستاننىڭ رەسمي دٸن قىزمەتكەرلەرٸنٸڭ سٶزٸنە سٸلتەمە جاساعان ەمومالي راحمون ورازا ۇستاۋ "فەرمەرلەر مەن باقتاشىلارعا, كٶپ جۇمىس ٸستەيتٸن ادامدارعا زيياندى" دەدٸ.
"ەگٸس القاپتارىندا جۇمىس ٸستەپ جاتقان ادامداردى ٶزدەرٸ مەن وتباسىنىڭ دەنساۋلىعىن ويلاپ, وسى رۇقساتتى پايدالانىپ, جاعداي تۇراقتالعانعا دەيٸن ورازانى شەگەرۋگە شاقىرامىن" دەدٸ ول.
بۇرىنعى سوۆەت رەسپۋبليكاسى عالامدىق ٸندەت كەزٸندە كوروناۆيرۋستىڭ ەكونوميكاعا ىقپالىن ازايتۋ ٷشٸن حالىقارالىق دونورلاردان شۇعىل كٶمەك سۇراعان. تەجٸكستان يمپورتتى ٶتەۋ ٷشٸن شەتەل ۆاليۋتاسىمەن قيىندىققا ۇشىراۋى مٷمكٸن. سەبەبٸ پاندەميياعا بايلانىستى رەسەيدەگٸ تەجٸك ميگرانتتارىنان تٷسەتٸن تابىس كٶلەمٸ ازايعان.
تەجٸكستاندا جۇمىس كٷشٸنٸڭ 65 پايىزى اۋىل شارۋاشىلىق سالاسىنا تارتىلعان.
اقش-تىڭ حالىقارالىق دٸن ەركٸندٸگٸ كوميسسيياسىنىڭ 2019 جىلعى ەسەبٸندە تەجٸكستان دٸن ەركٸندٸگٸن شەكتەپ, دٸني كٶزقاراسى ٷشٸن ادامداردى قۋدالايتىن مەملەكەت رەتٸندە اتالعان.
