Armeniia premer-ministri Nikol Pashinian 10 qarashaǵa qaraǵan túni Ázerbaijan, Resei, Armeniianyń Taýly Qarabaqtaǵy soǵysty toqtatý jóninde úshjaqty kelisimge kelgenin habarlady. Bul týraly Pashinian Feisbýk paraǵyna jazdy.
"Qurmetti otandastar, baýyrlarym men ápke-qaryndastarym! Ózime de, bárimizge de aýyr tietin sheshimge keldim. Resei jáne Ázerbaijan prezidentterimen Qarabaqtaǵy soǵysty toqtatý jóninde málimdemege qol qoidym. ... Ózimizdi jeńildik dep eseptemeimiz ári bul bizdiń ult retinde birigýimizdiń jáne qaita órleýimizdiń basy bolýy kerek. Qaza tapqandardyń aldynda tize búgemin. Otanyn qorǵaý jolynda ómirin aiamaǵan barlyq áskerilerdiń, ofitser, general, eriktilerdiń aldynda basymdy iemin. Olar artsah armiandaryn qorǵap, qurban boldy. Sońyna deiin kúrestik jáne jeńemiz!" dep jazdy Pashinian.
Atysty toqtatý jóninde kelisim jasalǵanyn Resei prezidenti Vladimir Pýtin de rastady. TASS agenttigi taratqan aqparatta Pýtin "kelisimge qol qoiylǵan sátte eki eldiń áskerileri turǵan jer Armeniia men Ázerbaijan territoriiasy retinde saqtalady. Al olardyń arasynda Reseidiń bitimger sarbazdary turady" degen.
Kelisimge sáikes, 2020 jyldyń 20 qarashasyna deiin Taýly Qarabaqtyń Gazah jáne Agdam aýdandary Ázerbaijanǵa qaitarylady. 15 qarashaǵa deiin Armeniia - Kelbadjar aýdanyn, 1 jeltoqsanǵa deiin Lachin aýdanyn berýi kerek. Biraq Taýly Qarabaqpen bailanysyn úzbeý úshin Lachin dálizin (eni 5 km) saqtap qalady. Alaida dáliz Shýsha qalasyn janamaidy.
Aimaqtan Armeniianyń búkil áskerileri shyǵarylady. Taýly Qarabaq pen Lachin dálizi túiisken tusta Reseidiń 1960 bitimger sarbazy ornalasady. Bitimgerlik kontingenttiń ol aimaqta qalý merzimi 5 jyl jáne ahýal turaqtamasa taǵy bes jylǵa sozylady.
Bosqyndardyń Taýly Qarabaqqa oralýyn BUU-nyń bosqyndar isi jónindegi joǵarǵy komissary baqylaidy. Odan bólek, Armeniia men Ázerbaijan tutqyndar men qaza tapqan sarbazdardyń máiitin almasady.
