ارمەنييا پرەمەر-مينيسترٸ نيكول پاشينيان 10 قاراشاعا قاراعان تٷنٸ ەزەربايجان, رەسەي, ارمەنييانىڭ تاۋلى قاراباقتاعى سوعىستى توقتاتۋ جٶنٸندە ٷشجاقتى كەلٸسٸمگە كەلگەنٸن حابارلادى. بۇل تۋرالى پاشينيان فەيسبۋك پاراعىنا جازدى.
"قۇرمەتتٸ وتانداستار, باۋىرلارىم مەن ەپكە-قارىنداستارىم! ٶزٸمە دە, بەرٸمٸزگە دە اۋىر تيەتٸن شەشٸمگە كەلدٸم. رەسەي جەنە ەزەربايجان پرەزيدەنتتەرٸمەن قاراباقتاعى سوعىستى توقتاتۋ جٶنٸندە مەلٸمدەمەگە قول قويدىم. ... ٶزٸمٸزدٸ جەڭٸلدٸك دەپ ەسەپتەمەيمٸز ەرٸ بۇل بٸزدٸڭ ۇلت رەتٸندە بٸرٸگۋٸمٸزدٸڭ جەنە قايتا ٶرلەۋٸمٸزدٸڭ باسى بولۋى كەرەك. قازا تاپقانداردىڭ الدىندا تٸزە بٷگەمٸن. وتانىن قورعاۋ جولىندا ٶمٸرٸن اياماعان بارلىق ەسكەريلەردٸڭ, وفيتسەر, گەنەرال, ەرٸكتٸلەردٸڭ الدىندا باسىمدى يەمٸن. ولار ارتساح ارمياندارىن قورعاپ, قۇربان بولدى. سوڭىنا دەيٸن كٷرەستٸك جەنە جەڭەمٸز!" دەپ جازدى پاشينيان.
اتىستى توقتاتۋ جٶنٸندە كەلٸسٸم جاسالعانىن رەسەي پرەزيدەنتٸ ۆلاديمير پۋتين دە راستادى. تاسس اگەنتتٸگٸ تاراتقان اقپاراتتا پۋتين "كەلٸسٸمگە قول قويىلعان سەتتە ەكٸ ەلدٸڭ ەسكەريلەرٸ تۇرعان جەر ارمەنييا مەن ەزەربايجان تەرريتوريياسى رەتٸندە ساقتالادى. ال ولاردىڭ اراسىندا رەسەيدٸڭ بٸتٸمگەر ساربازدارى تۇرادى" دەگەن.
كەلٸسٸمگە سەيكەس, 2020 جىلدىڭ 20 قاراشاسىنا دەيٸن تاۋلى قاراباقتىڭ گازاح جەنە اگدام اۋداندارى ەزەربايجانعا قايتارىلادى. 15 قاراشاعا دەيٸن ارمەنييا - كەلبادجار اۋدانىن, 1 جەلتوقسانعا دەيٸن لاچين اۋدانىن بەرۋٸ كەرەك. بٸراق تاۋلى قاراباقپەن بايلانىسىن ٷزبەۋ ٷشٸن لاچين دەلٸزٸن (ەنٸ 5 كم) ساقتاپ قالادى. الايدا دەلٸز شۋشا قالاسىن جانامايدى.
ايماقتان ارمەنييانىڭ بٷكٸل ەسكەريلەرٸ شىعارىلادى. تاۋلى قاراباق پەن لاچين دەلٸزٸ تٷيٸسكەن تۇستا رەسەيدٸڭ 1960 بٸتٸمگەر ساربازى ورنالاسادى. بٸتٸمگەرلٸك كونتينگەنتتٸڭ ول ايماقتا قالۋ مەرزٸمٸ 5 جىل جەنە احۋال تۇراقتاماسا تاعى بەس جىلعا سوزىلادى.
بوسقىنداردىڭ تاۋلى قاراباققا ورالۋىن بۇۇ-نىڭ بوسقىندار ٸسٸ جٶنٸندەگٸ جوعارعى كوميسسارى باقىلايدى. ودان بٶلەك, ارمەنييا مەن ەزەربايجان تۇتقىندار مەن قازا تاپقان ساربازداردىڭ مەيٸتٸن الماسادى.
