TJM daǵdarys ortalyǵynda vitse-premer – Sý tasqynyna qarsy sharalardy úilestirý jáne qarǵyn sý júrý kezeńiniń saldaryn joiý jónindegi respýblikalyq shtab basshysynyń orynbasary Qanat Bozymbaev pen tótenshe jaǵdailar ministri Shyńǵys Árinovtiń qatysýymen keńes ótti.
3 sáýirdegi jaǵdai boiynsha eldegi sý tasqynyna qatysty ahýal áli de kúrdeli. 6 óńirde 1 364 jeke menshik turǵyn úidi sý basqan. Avtojoldardyń 105 ýchaskesinde sý jaiylǵan. 78 jol ýchaskesinde búlingen jerlerdi jáne 4 kópirdi qalpyna keltirý jumystary júrgizilip jatyr. 64 eldi mekenge kólik qatynasy joq, olarǵa azyq-túlik pen dári-dármek jetkizilýde.
Sý basqan aimaqtardan turǵyndardy evakýatsiialaý táýlik boiy júrgizilip jatyr. Sońǵy táýlikte qutqarýshylar 1 524 adamdy, onyń ishinde 496 balany evakýatsiialady.
Oblystaǵy sý aidyndarynda muz keptelisin boldyrmaý úshin muz jarý jumystary júrgizilýde.
Sý tasqynyna qatysty ahýaldy baǵalaý úshin 1-3 sáýir aralyǵynda vitse-premer men tótenshe jaǵdailar ministri Qaraǵandy, Qostanai jáne Aqmola oblystarynyń aýmaǵyn áýeden barlady.
Búgin Arshaly, Tselinograd aýdandary men Qosshy qalasynyń aýmaǵy zerttedi, sondai-aq Preobrajenskii sý torabyna bardy.
Qazirgi ýaqytta oblysta qar jamylǵysy shamamen 76% quraidy. TJM kúshteri men quraldaryn Tselinograd, Arshaly, Atbasar, Sandyqtaý aýdandarynyń, Kókshetaý jáne Qosshy qalalarynyń 17 eldi mekenine bólý uiymdastyryldy.
Qaraǵandy oblysynyń aýmaǵynda qar jamylǵysy shamamen 34% quraidy. Oblysta aldyn alý is-sharalary, onyń ishinde jaǵalaýdy nyǵaitý jumystary jáne qapshyqtardy tóseý jumystary júrgizilýde. Barlyǵy 700-ge jýyq adam jáne 118 birlik tehnika jumyldyryldy. Qazir jaǵdai turaqty.
Qostanai oblysy boiynsha qar jamylǵysy shamamen 71%. 75 turǵyn úi men 38 aýla aýmaǵyn sý basqan. Atalǵan eldi mekenderge TJM-niń Shyǵys Qazaqstan, Qaraǵandy jáne Qyzylorda oblystarynan barǵan qosymsha kúshteri men quraldary tartyldy, jaǵalaýdy nyǵaitý jumystary júrgizilip jatyr.
Qazir Arqalyq qalasy men Amangeldi aýdanynda jaǵdai turaqtaldy. Jangeldi aýdanynda jaǵdai áli kúrdeli. Ákimdik barlyq qajetti sharalardy qabyldaýda.
Óńirlerde shyǵyndy baǵalaý boiynsha jumystar bastaldy. Táýlik boiy monitoring júrgizilýde. Aldaǵy kúnderi elimiz boiynsha jaýyn-shashyn jáne temperatýralyq fonnyń kúrt kóterilýi kútilýde, bul qardyń qarqyndy erýine ákeledi.
Keńes qorytyndysy boiynsha Respýblikalyq shtab basshysynyń orynbasary óńirlerdiń ákimdikterine qaýipsizdikti qamtamasyz etý, sý basqan aimaqtardan adamdardy aldyn ala evakýatsiialaý jáne qutqarý jóninde qajetti sharalar qabyldaý týraly tiisti tapsyrmalar berdi.
