Búgin elordadaǵy QR Ulttyq mýzeiinde Altyn Orda kezeńinen syr shertetin «Ulyq Ulys» atty jańa zal ashyldy, dep habarlaidy "Ult aqparat".
«Biz árdaiym keń baitaq jerimiz ben tereń tarihymyzdy maqtanyshpen aita alamyz. Sonyń biri - Altyn Orda kezeńindegi tarih. Ózderińiz biletindei, ótken jyly Memleket basshysynyń bastamasymen Altyn Ordanyń mereitoiyn el bolyp atap óttik. Altyn orda kezeńi men tarihy birneshe ult ókilderimen bailanysty ekeni aian. Biraq Altyn Ordanyń qai jerde qurylǵany jáne ony kimder qurǵany tarihtan belgili. Onyń ústine tarihy tereń osynaý ortaǵasyrlyq memlekettiń mereitoiyn memlekettik deńdeide alǵash biz atap ótip otyrmyz. Búgingi kórmege biraz qundy dúnieler qoiylǵan», - dedi QR Ulttyq mýzeidiń direktory Arystanbek Muhamediuly zaldyń ashylý saltanatynda.
Kórmeni uiymdastyrýshylardyń aitýynsha, mýzeidiń ǵylymi qyzmetkerleri jańa zalǵa qoiatyn jádigerlerdi izdep, Ulytaýǵa arnaiy ǵylymi saparmen barǵan.
«Altyn Ordanyń negizin qalaýshy - qazaq ulty ekeni anyq. Bul memlekettiń áli de bolsa ashylmaǵan syrlary kóp. Altyn ordaǵa qatysty kóptegen qundy derekter syrtta ekeni de ras. Sondyqtan aldaǵy ýaqytta bizdiń tarihshylar men ǵalymdar zertteitin dúnie jetkilikti», - deidi ol.
Jańa zalda Ulyq Ulys kezeńiniń mádenietin, turmys-tirshiligimen tanystyratyn ortaǵasyrlyq qalalardan tabylǵan arheologiialyq artefaktiler, nýmizmatikalyq toptamalar, dini-minájattyq ǵimarat maketi men basqa da qundy jádigerler qoiylǵan.
Odan bólek, ekspozitsiialar arasynda shetel muraǵattarynan tabylǵan handardyń resmi jazbalarynyń kóshirmeleri, memlekettiń rámizi bolyp tabylatyn Ulyq Ulys týynyń qaita jańǵyrtylǵan nusqasy (Eýropalyq teńiz kartalaryndaǵy málimetterge súienip) oryn alǵan.
Sonymen birge Ulyq Ulys handarynyń elshilerge, saýdager-kópesterge bergen negizgi senim qujattary - paizylardyń kóshirmesi, Joshy urpaqtarynyń shejiresi (Sol qanat) kópshiliktiń nazaryna usynylyp otyr.
«Táýelsizdiktiń 30 jyldyǵyna orai osyndai aitýly tarihi sátke kýá bolǵanymyz qýantady. Bul - tarihi ádilettilik. Sebebi, ózderińiz bilesizder, kezinde Altyn ordaǵa qatysty birshama jańsaq pikirler boldy, tipti bul taqyrypty qozǵaýǵa tyiym da saldy. Endi, mine, tarihi shyndyqty jańǵyrtyp otyrmyz. Sonaý Altyn Ordanyń kezindegi ulttar, búgingi qyrym, tatar, bashqurttar bizge qyzyǵa da qyzǵana qaraidy. Sondyqtan biz bai tarihymyzdy maqtan tutýymyz kerek. Jáne osy baǵyttaǵy jumysty toqtatpai, jas zertteýshi ǵalymdardy tartyp, jalǵastyrýymyz kerek», - dedi QR Parlamenti Májilisiniń depýtaty Berik Ábdiǵaliuly.
