Londonda Táýelsizdiktiń 30 jyldyǵy sán-saltanatymen atalyp ótildi. Qazaqstannyń Ulybritaniiadaǵy Elshiligi uiymdastyrǵan sharaǵa jergilikti saiasi, ekonomikalyq jáne mádeni isteblishmenttiń ókilderi, jýrnalister, sheteldik diplomattar jáne qazaq diasporasy qatysyp, qýanyshqa ortaqtasty, dep habarlaidy QazAqparat agenttigi.
1991 jyly Qazaqstan týraly Ulybritaniiada kóp adam bile bermeitin. El egemendigin alǵannan keiin týra bir ai ótken soń eki el arasynda diplomatiialyq áriptestik ornatyldy. Búginde Birikken Koroldik Qazaqstan ekonomikasynyń iri investorlarynyń biri. 30 jyl ishinde kóptegen salalar boiynsha ekijaqty qarym-qatynastar ornatylyp, olar jańa sapalyq deńgeige kóterildi.
Merekelik shara barysynda qonaqtarǵa, sondai-aq, Táýelsizdik jyldaryndaǵy jetistikter men Qazaqstan-Britan qatynastary damýynyń negizgi kezeńderi týraly baiandaldy. Qazaqstannyń Birikken Koroldiktegi elshisi Erlan Ydyrysov tarihi ólshem boiynsha qysqa ýaqyt ishinde memleketimizdiń Ortalyq Aziianyń iri ekonomikasyna ainala alǵanyn atap ótti. Keshke Ulybritaniianyń Eýropa jáne Amerika isteri jónindegi memlekettik ministri Vendi Morton arnaiy kelip, júrekjardy lebizin jetkizdi.
«Úsh onjyldyq kóleminde diplomatiialyq áriptestigimiz nyǵaiyp keledi. Sizder taýarlar men qyzmetter saýdasynyń kólemi jylyna shamamen 1,4 milliard sterling fýnt bolatyn Ortalyq Aziiadaǵy bizdiń iri seriktesimizsizder. Sonymen qatar Qazaqstan Ulybritaniianyń klimattyń ózgerýine qarsy kúrestegi negizgi jahandyq áriptesteriniń biri», - deidi ministr.
Sharada «Qos arna» etnofolklorlyq ansambli Ulybritaniia jurtshylyǵyn ulttyq ónermen sýsyndatty. Jas ónerpazdar dombyra, qobyz, sybyzǵy jáne jetigende oinap, jinalǵandardy Uly dalanyń mýzykalyq jaýharlarymen tanystyrdy.
Aida Jahanbek Ulybritaniiadaǵy Sheffild ýniversitetiniń mýzyka fakýltetinde oqidy, al onyń inisi Azamat Qurmanǵazy atyndaǵy Qazaq ulttyq konservatoriiasy Halyq mýzykasy fakýltetiniń stýdenti. Keshte olar «Shili ózen» ánin jáne Nurǵisa Tilendievtiń «Aqqý» kúiin naqyshyna keltirip oryndap, zor qoshemetke ie boldy. Sonymen qatar ulttyq aspaptardyń súiemeldeýimen aǵylshyndarǵa etene tanys «Tóbemnen tamshylaǵan jańbyr» ánin aityp, kópshilikti tań-tamasha etti.
«Bul shyǵarmalardy tańdaǵan sebebimiz qazaq halqynyń árbir aspabyn jekeshelep kórsetý jáne de qazaq aspaptarymen tek qana dástúrli mýzykany ǵana emes soǵan qosa pop janryndaǵy jáne djaz janryndaǵy búkil ánderdi oryndaýǵa bolatyndyǵyn kórsetkimiz keldi», - deidi Azamat Jahanbek.
«Qos arnany» tyńdaý arqyly men óte erekshe áserge bólendim. Ulttyq aspaptardyń daýsy ǵajap. Dombyradan basqalaryn buǵan deiin estimegen ekenmin. «Aqqý» kúiin oryndaǵan kezde sol qustardy kóz aldyma elestettim. Ásirese, aspaptardyń kúshimen olardyń daýsyn salǵan kezde ǵajap sezimge bólendim», - deidi britaniialyq Djil Braýn.
Qonaqtar otandyq sýretshiler men dizainerlerdiń eńbekteri qoiylǵan kórmege qatysty. Atap aitqanda olardyń nazaryna belgili sýretshi Aiǵana Ǵalidiń eńbekteri, sondai-aq Glazgodaǵy BUU klimattyń ózgerýi jónindegi halyqaralyq konferentsiiasynda qoiylǵan Qazaqstan balalarynyń jahandyq jylyný taqyrybyndaǵy sýretteri usynyldy.
Kesh qonaqtaryn «Silk Road Fashion London» kompaniiasynyń qoldaýymen qazaqstandyq dizainer Aidana Omarovanyń «Omabelle» brendiniń ulttyq kostiýmderin kigen modelder qarsy alyp, shyǵaryp saldy. Sonymen qatar eski dástúr boiynsha «sarqyt» retinde Qazaqstan týraly jazylǵan kitaptar men aport almasy syiǵa tartyldy.
