19 shildeden 20 qyrkúiekke deiin «Táýelsizdik urpaqtary» grantyna ótinimder qabyldanady, dep habarlaidy QazAqparat.
Bul týraly QR Aqparat jáne qoǵamdyq damý ministrligi Jastar jáne otbasy isteri komitetiniń tóraǵasy Shahmardan Baimanov Ortalyq kommýnikatsiialar qyzmetinde aityp berdi.
«Táýelsizdik rýhymen ósip kele jatqan búgingi táýelsizdik urpaqtary – bizdiń erteńgi úmitimiz, senimdi tiregimiz. 30 jyldyq tarihy bar Táýelsiz Qazaqstannyń memlekettik saiasatynyń negizgi basymdyǵy da - jastardy qoldaý jáne adami kapitaldy damytý bolyp sanalady. Búginde elimizdegi Táýelsizdik urpaqtary 3,8 mln nemese el halqynyń 20%-yn quraidy», - dedi Sh. Baimanov.
El Prezidenti Q.K.Toqaev «Táýelsizdik bárinen qymbat» maqalasynda Táýelsizdik jyldary dúniege kelgen daryndy jastarǵa naqty qoldaý retinde «Táýelsizdik urpaqtary» atty grant taǵaiyndaý qajettigin atap ótken.
Osyǵan orai, Ministrlik 2021 jyldyń 8 shildesinde Úkimet qaýlysymen «Táýelsizdik urpaqtary» grantyn taǵaiyndaý boiynsha erejeleri men tujyrymdamasyn bekitti.
«Biyl alǵash ret Táýelsizdiktiń 30 jyldyǵyna orai, úzdik 30 jobaǵa 3 mln teńgeden «Táýelsizdik urpaqtary» atty grant beriledi. Elimizdiń 14-29 jas aralyǵyndaǵy barlyq azamattaryna arnalǵan granttyń negizgi maqsaty – belsendi shyǵarmashyl jastardyń jobalaryn, bastamalaryn iske asyrý, qolda bar jobalardy damytý, ǵylymi jáne qoldanbaly zertteýler júrgizý jáne jastardy oqytý úshin paidalanýǵa berý bolady», - deidi Sh. Baimanov.
Aita keteiik, granttar QR azamattaryna jańa ideialar men bastamalardy iske asyrý úshin kelesi baǵyttar boiynsha konkýrstyq negizde beriledi:
«Ǵylym» - ǵylymnyń basym sektorlarynda jańa ǵylymi jobalar men zertteýlerdi iske asyrý úshin;
«Mádeniet» - Qazaqstannyń mádeni murasyn tanymal etýge, halyqtyq mádeni dástúrler men ónerdi ilgeriletýge baǵyttalǵan jobalardy iske asyrý úshin;
«Aqparattyq tehnologiialar» - jańa IT-sheshimder men jobalardy, onyń ishinde bastaýshy startap-jobalardy iske asyrý jáne ázirleý úshin;
«Biznes» - ekonomikanyń basym sektorlarynda jańa biznes-ideialardy iske asyrý úshin;
«Media» - jańa media-jobalardy, onyń ishinde jastar úshin tanymdyq, paidaly, qyzyqty kontentti qurý jónindegi jobalardy iske asyrý úshin.
Konkýrstyq ótinimder memlekettik nemese orys tilderinde qabyldanady jáne onda tómendegi málimet bolýy qajet:
jobanyń sipattamasy;
jobanyń beineprezentatsiiasy (60 sekýndtan kóp emes);
shyǵyndar smetasynyń jobasy;
ziiatkerlik menshik týraly málimetter (bar bolsa).
